BQO-da Aqtóbedegi lańkestik oqıǵa kezinde erlikpen qaza tapqan Berikjan Qalıevke eskertkish taqta ashyldy
ORAL. QazAqparat - Jánibek aýdany Jaqsybaı aýylyndaǵy M.Yqsanov atyndaǵy kóshede bıyl jazda Aqtóbe qalasyndaǵy lańkestik oqıǵa kezinde erlikpen qaza tapqan Berikjan Qalıevke eskertkish taqta ornatyldy, dep habarlaıdy QazAqparat.
Onyń ashylý rásimine qatysqan aýdan ákimi Naýryzbaı Qaraǵoıshın, aýdandyq ardagerler keńesiniń tóraǵasy Amangeldi Ýálıev beıbit kezde lańkesterge qasqaıa qarsy turǵan erdiń esimi eshqashan umytylmaıtynyn atap ótti. Berikjannyń aǵasy Baýyrjan Qalıev táýelsizdiktiń torqaly toıy qarsańynda inisine kórsetilgen qurmet úshin rızashylyǵyn bildirdi.
Sondaı-aq osy kúni soǵys jáne eńbek ardagerleri Qońqash Eńsepov pen Júsipqalı Qaraqulov atyndaǵy kóshelerge qos maıdangerge memorıaldyq taqta, al M.Yqsanov atyndaǵy mektepte aýyl eńbekkerlerine qurmet taqtasy ornatyldy.
Eske sala keteıik, Aqtóbedegi oqıǵa kezinde lańkester qolynan qaza tapqan 6655-áskerı bóliminde kelisimshart negizinde qyzmet atqarǵan kishi serjant Berikjan Qalıev 8 maýsym kúni osy Jaqsybaı aýylynda qurmetpen jerlengen bolatyn. Keıin sońynda zaıyby Nursulý men tórt balasy qalǵan marqumnyń otbasyna Oral qalasynan úsh bólmeli páter berildi.
