BQO-da aqsha aıyrbastaýmen aınalysqandardy óltirgenderge qatysty úkim shyqty
ORAL. QazAqparat - BQO qylmystyq ister jónindegi mamandandyrylǵan aýdanaralyq sotynda aqsha aıyrbastaýmen aınalysqandardy óltirgenderge qatysty úkim shyqty, dep habarlaıdy QazAqparat tilshisi.
Atalmysh sottan túsken málimetke qaraǵanda, asa aýyr qylmystardyń bári de Aqsaı qalasynda jasalǵan.
Bir-birimen dostyq qarym-qatynastaǵy Aqsaı qalasynyń turǵyndary A.Pishenbaev, J.Tólepov jáne J.Nıtalıev 2014 jylǵy aqpan aıynyń ortasynda M.Jumaǵazıevanyń aqsha aıyrbastaýmen aınalysatynyn bilgen.
Betperde kıip, temir qubyrmen qarýlanǵan top 26 aqpan kúni M.Jumaǵazıevanyń úıdiń kireberisine kirgenin paıdalanyp, basynan uryp, qolyndaǵy sómkesin tartyp almaq bolǵan. Alaıda jábirlenýshiniń aıqaıynan kórshiler shyǵa bastaǵandyqtan, oqıǵa ornynan boı tasalaǵan.
Atalǵan top 2015 jyldyń sáýir aıynda Aqsaı qalasynyń turǵyny J.Sıdalıevanyń úıine kirip, iri mólsherde urlyq jasaǵan. «RIKmırkýr» JShS dúkenine de túsken.
2015 jyldyń qyrkúıeginde úsheýine Á.Ótepov qosylyp, aldyn ala sóz baılasyp, aqsha aıyrbastaýmen aınalysqan T.Jumaǵazıevke qaraqshylyq shabýyl jasap, óltirý úshin qylmystyq jospar quryp, sholaq myltyqty daıyndaǵan. Aqyry 7 qazan kúni ony úıiniń esiginiń aldynda atyp óltirgen.
2016 jyldyń tamyz aıynda A.Pishenbaev Aqsaı qalasynda A.Súıindikovanyń úıine zańsyz kirip, seıften altyn buıymdardy úptep ketken.
2017 jylǵy maýsymda A.Pishenbaev pen J.Tólepov adamdar tobymen aldyn ala sóz baılasyp, Aqsaıdaǵy Zavodskaıa kóshesindegi S.Rasqulovanyń úıine zańsyz kirip, aqshalaı qarajattaryn jymqyrǵan.
Munymen toqtamaǵan A.Pishenbaev ótken jyldyń maýsymynda aqsha aıyrbastaýmen aınalysqan J.Aralbaevty ańshy pyshaǵymen soqqylar jasap, qasaqana óltirgen.
Al A.Mamanov pen A.Nurlyhanov A.Pishenbaevtyń asa aýyr qylmys jasaǵanyn anyq bile tura quqyq qorǵaý organdaryna habarlamaǵan.
Sot úkimimen kisi óltirip, qaraqshylyqqa baryp, tonaǵany, zańsyz qarý daıyndap, saqtaǵany jáne urlyq jasaǵany úshin aıypty dep tanylǵan 29 jasar A.Pishenbaev túpkilikti 20 jyl merzimge bas bostandyǵynan aıyryldy.
Osyndaı qylmystarǵa barǵan 27 jasar J.Tólepovke 17 jyl, 29-daǵy J.Nıtalıev pen 30-daǵy Á.Ótepovke 16 jyl kesildi.
Bulardyń tórteýi de qaýipsizdigi barynsha joǵary qylmystyq-atqarý júıesi mekemesinde jazalaryn óteıdi.
19 jasar A.Mamanov pen 25-tegi A.Nurlyhanov QR QK 434-babyna sáıkes 3 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy.
Sot úkimi zańdy kúshine engen joq.
