BQO-da ákimderdiń turǵyndarmen 400-den astam kezdesýi ótedi
ORAL. QazAqparat - Elbasy Jarlyǵyna sáıkes óńirde barlyq deńgeıdegi ákimder qańtar, aqpan aılarynda turǵyndar aldynda esep beredi, dep habarlaıdy «QazAqparat» tilshisi.
BQO ákimi apparaty uıymdastyrý-ınspektorlyq jumystary bóliminiń basshysy Jasulan Nurǵojınniń aıtýynsha, bıyl aýyl, aýdan jáne qala ákimderi 15 qańtar men 15 aqpan aralyǵynda turǵyndarmen eseptik jıyndaryn ótkizedi. Sodan keıin óńir basshysy Altaı Kólginovtiń eseptik kezdesýi de ótedi. Barlyǵy 400-den astam júzdesý bolmaq.
«Ótken jylǵy kezdesýlerdiń nátıjesinde 53 másele oblys ákiminiń baqylaýyna alyndy. Qazirgi kezde bulardyń oryndalýyna monıtorıng jasalýda, qorytyndysy keıin belgili bolmaq», dedi «QazAqparat» tilshisine J.Nurǵojın.
Oral qalasy ákimdiginen túsken málimetke qaraǵanda, shahar basshysy Murat Muqaev 15 qańtar kúni Jelaev selolyq okrýginde, 17-sinde Krýgloozernyı, 19-ynda Zachagan kentinde, 24-inde Derkól mádenıet úıinde turǵyndar aldynda esep beredi. Qala ákiminiń qorytyndy kezdesýi 12 aqpan kúni bolmaq. Osyǵan baılanysty usynys, eskertýler men pikirlerdi jınaýǵa arnalǵan jáshikter ornatylady.
Aıta keteıik, bıyl oblys ákimi Altaı Kólginovtiń bastamasymen usynys-pikirlerdiń aıasyn keńeıtý maqsatynda qosymsha onlaın saýalnama júrgizý qolǵa alyndy. Onda ár turǵyn kórsetilgen ózekti máseleler boıynsha qaı salaǵa kóńil bólý kerektigi týraly óz oı-pikirlerin bildire alady.
