BQO-da ákimder turǵyndar aldynda esep berýde
ORAL. QazAqparat - Memleket basshysynyń 2016 jylǵy 5 aqpandaǵy «Ortalyq atqarýshy organdar basshylarynyń, ákimderdiń, ulttyq joǵary oqý oryndary rektorlarynyń halyqqa esep berý kezdesýlerin ótkizý týraly» №190 Jarlyǵyna sáıkes Batys Qazaqstan oblysynda ákimder turǵyndar aldynda esep berýde, dep habarlaıdy «QazAqparat» HAA tilshisi.
BQO ákimdiginen túsken málimetke qaraǵanda, kúni búgin josparlanǵan 185 kezdesý ótip, oǵan 7972 turǵyn qatysty. Ázirge aýyldyq okrýg ákimderi esep berýde.
Bıyl Batys Qazaqstan oblysy boıynsha barlyǵy 413 esep berý kezdesýlerin ótkizý kózdelýde. Sonyń ishinde aýyldyq okrýgterdiń eldi mekenderinde 246, okrýg ortalyqtarynda 153 jıyn, Oral qalasy men aýdandar ákimderiniń jáne óńir basshysynyń 14 eseptik kezdesýi bar.
Ótken jyl qorytyndylary saralanyp, aldaǵy maqsat-mindetter pysyqtalatyn kezdesýlerge jergilikti atqarýshy organdar ókilderi, máslıhat depýtattary jáne qoǵamdyq keńes músheleri qatysýda.
Aıta keteıik, aldyn ala málimetter boıynsha oblys ákimi Altaı Kólginovtiń eseptik kezdesýi 17 aqpanda Oraldaǵy tennıs ortalyǵynda ótpekshi. Sol sekildi Oral qalasynyń ákimi Narıman Tóreǵalıev 14 aqpan kúni «Nur Otan» partııasy oblystyq fılıaly ǵımaratynyń zalynda esep bermekshi.
