BQO-da ákeli-balaly esirtki satýshylar uzaq merzimge sottaldy
ORAL. QazAqparat - BQO qylmystyq ister jónindegi mamandandyrylǵan aýdanaralyq soty esirtkini zańsyz saqtap, ótkizgen ákeli-balaly Kozlovtarǵa qatysty úkimdi jarııa etti.
BQO sotynyń baspasóz qyzmetinen túsken málimetke qaraǵanda, Evgenıı men onyń ákesi Valerıı Kozlov aldyn ala sóz baılasyp, keptirilgen marıhýanany Oral qalalyq ishki ister basqarmasy esirtki bıznesimen kúres bóliminiń qyzmetkerleri iske qosqan satyp alýshylarǵa ótkizgen. Ósimdik tektes esirtki zaty iri kólemde E.Kozlovty ustaý kezinde jáne olardyń mekenjaılarynan da tabylǵan.
Sot úkimimen ákeli-balaly esirtki saqtap, satýshylar QR QK 297-baby 3-bólimi 1-tarmaǵy boıynsha aıypty dep tanyldy. V.Kozlov múlkin tárkileýmen birge 12 jylǵa bas bostandyǵynan aıyrý jazasyn erekshe tártiptegi túzetý kolonııasynda óteýge sottaldy. E.Kozlovqa dál osyndaı jaza kesilip, ol 13 jylǵa bas bostandyǵynan aıyryldy. E.Kozlovqa QR QK 60-baby qoldanyldy, óıtkeni ol budan buryn QR QK 178-baby 2-bólimi «a, v» tarmaqtary, 24-baby 3-bólimi, 178-baby 2-bólimi «a, b, v, g, d» tarmaqtary, 120-baby 1-bólimi boıynsha 4 jylǵa bas bostandyǵynan aıyrylyp, ótken jyly 27 naýryzda merziminen buryn shartty túrde bosatylǵan (jazasynyń ótelmegen merzimi - 1 jyl 7 aı 14 kún) bolatyn.
Sot úkimdi taǵaıyndaǵanda olardyń qylmystarynyń qaýiptiligin eskerdi, sonymen qatar sottalýshylar jazasyn óteý ornynda nashaqorlyqtan májbúrli túrde emdeletin bolady.
