BQO-da «Aqbulaq» baǵdarlamasy aıasynda 39 joba júzege asyrylýda

ORAL. QazAqparat - Batys Qazaqstan oblysynda «Aqbulaq» baǵdarlamasy aıasynda 7 mlrd teńgege 39 joba júzege asyrylýda, dep habarlaıdy «QazAqparat» tilshisi.

BQO qurylys basqarmasynan túsken málimetke qaraǵanda, osy qarjynyń teń jartysynan astamy respýblıkalyq bıýdjetten, 1,9 mlrd teńge Ulttyq qordan, 1,4 mlrd teńge jergilikti qazynadan bólingen. Osy joba júzege asyrylǵan kezde 54 aýyl taza sýmen qamtylady. Mundaı eldi mekenderdiń jalpy sany 186-ǵa jetpek. Osyǵan deıin 443 eldi mekenniń 37 paıyzy ǵana ortalyqtandyrylǵan sý kózine qosylsa, endi bul kórsetkish 42 paıyzdy (respýblıkalyq orta kórsetkish - 52,3 paıyz) quramaq.

Óńirde aýyz sý máselesi ótkir turǵan aýdannyń biri - Jańaqala. Munda turǵyndardyń 70 paıyzy taza sýǵa qol jetkize almaı otyr. Bul máseleni sheshý maqsatynda zertteý jumystary júrgizilip, kórshiles Bókeı ordasy aýdany aýmaǵynda Qulshyq degen jerden sý tartý kerek dep tabyldy. Ondaǵy sý qory 27 jylǵa jetedi, degenmen araqashyqtyq 151 shaqyrymǵa jetetindikten, edáýir qarjyny qajet etedi. Oblys basshylyǵy usynǵan 2,5 mlrd teńgeni quraıtyn joba Úkimet tarapynan qoldaý taýyp, QR Aýyl sharýashylyǵy mınıstrligi arqyly júzege asyrylmaqshy. Bıyl sý qubyryn tartýdyń birinshi kezeńi bastalyp, bul aýqymdy jumys kelesi jyly jalǵasyn tabady.

Aıta keteıik, «Aqbulaq» baǵdarlamasy qolǵa alynǵannan beri oblysta buǵan deıin 67 nysan qoldanysqa berildi.