BQO-da Aqbulaq aýylyndaǵy bóget qalpyna keltirile me
ORAL. KAZINFORM — Batys Qazaqstan oblysynda Bórli aýdany Aqbulaq aýylynyń turǵyndary áleýmettik jelide beınejazba jarııalady.
Aýyl turǵyndary Qazaqstan Prezıdenti men BQO prokýroryna arnaǵan úndeýinde 106,4 mln teńgege kúrdeli jóndeýden ótkizilgen bógetti tasqyn sýdyń bir ǵana táýlik ishinde buzyp ketkenin aıtyp, sondyqtan ony qalpyna keltirý jóninde kómek suraǵan. Turǵyndar aýyldyq okrýg ákiminiń qabyldaýynda bolǵanymen, odan nátıje shyqpaǵan.
Olardyń sózine qaraǵanda, turǵyndardyń kúnkórisi malmen baılanysty. Qazirgi kezde mal ishetin sý joq.
Osyǵan oraı Kazinform tilshisi Bórli aýdany ákimdigine saýal joldady.
Aýdan ákiminiń orynbasary Muhtar Nurmaqovtyń málim etkenindeı, Bórli aýdany turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi «Ýralvodproekt» JShS-men memlekettik satyp alý nátıjesine sáıkes Aqbulaq aýylynyń ońtústik bóliginde ornalasqan bógetti kúrdeli jóndeýden ótkizý boıynsha jobalyq-smetalyq qujattamany ázirleý úshin 2020 jylǵy 20 shildede shart jasasqan.
Muhtar Serikulynyń málimdeýinshe, 2020 jyly shartqa sáıkes JSQ ázirlenip, 2021 jylǵy 21 maýsymda «Memlekettik saraptama» RMK-nyń oń qorytyndysy alynǵan. Atalmysh bógetke kúrdeli jóndeý jumystaryn 2022 jyly «AqsaıStroıServıs ı K» JShS júrgizdi. Tehnıkalyq qadaǵalaýdy «Ásem-Qurylys-Qyzylorda» JShS júzege asyrdy. Shart somasy — 110,9 mln teńge. Qurylys-montaj jumystary jobaǵa sáıkes oryndalyp, nysan 2022 jylǵy qarashada paıdalanýǵa berildi.
— Alaıda 2023 jylǵy kóktemde erigen qar sýynyń kólemi bógettiń sý ótkizgish qurylǵysynyń ótkizý qabiletinen asyp tústi. Sonyń saldarynan tasqyn sý bógetti shaıyp ketti. 2023 jyly «SPS» JShS daıyndaǵan qysqasha gıdrologııalyq jazba negizinde bógettiń buzylý sebebi sý ótkizý qurylystarynyń jetkiliksiz ótkizý qabileti bolǵany anyqtaldy, — deıdi aýdan ákiminiń orynbasary.
Onyń aıtýynsha, 2023 jyly Bórli aýdany turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi jobalyq uıym — «Ýralvodproekt» JShS-ne bógetti qalpyna keltirý boıynsha talap-aryzben sotqa júgindi. Áıtse de 2023 jylǵy jeltoqsanda sot jaýapker tarapynan mindettemelerdi tıisinshe oryndamaý faktisiniń bolmaýyna baılanysty bólimniń qalpyna keltirý jumystaryn oryndaý jónindegi talap-aryzyn qanaǵattandyrýdan bas tartty.
— «Batys Qazaqstan oblysy Bórli aýdany Aqbulaq aýylyndaǵy bógettiń sý burý qurylysyn qalpyna keltirý jáne aǵymdaǵy jóndeý» jobasy boıynsha 91,2 mln teńgege esepteý júrgizildi. Qazirgi ýaqytta qajetti qarajat kólemin bólý joldary qarastyrylýda. Qalpyna keltirý jumystaryn osy jyly júrgizý josparlanýda. Bul másele aýdan ákimdiginiń baqylaýynda, — dedi M.Nurmaqov.
Eske sala keteıik, budan buryn Batys Qazaqstanda tasqyn sýdan keler qaýip qandaı ekendigin jazǵan bolatynbyz.