BQO-da «Aq bıdaı» aýyl sporty oıyndary ótýde
ORAL. QazAqparat - Búgin Zelenov aýdanynda VI «Aq bıdaı» aýyl sporty oıyndarynyń oblystyq jarystary bastaldy, dep habarlaıdy «QazAqparat» tilshisi.
BQO dene shynyqtyrý jáne sport basqarmasynan túsken málimetke qaraǵanda, alaman báıgede Tasqala aýdanynan Baýyrjan Mámbetov baptaǵan «Amanat» atty sáıgúlik márege birinshi keldi. Zelenovtyq Marat Asanovtyń «Aımańdaıy» ekinshi, jańaqalalyq Erbolat Aıtqalıevtiń «Nazqońyry» úshinshi bolyp jetti. 11 shaqyrymdyq top báıgede M.Asanovtyń «Shalqyma» atty tulpary aldyna eshkimdi salmasa, terektilik ıAkov Lıpnaýdyń «Sııavıch», shyńǵyrlaýlyq Nurbolat Aqpanovtyń «Aıtumary» úzdik úshtikke ilikti.
Birneshe kúnge sozylatyn jarys barysynda sondaı-aq aýdaryspaq, teńge alý, jamby atý, kókpar, voleıbol, qazaq kúresi, jazǵy prezıdenttik kópsaıys, gir sporty, qol kúresi, asyq atý, toǵyzqumalaq jáne shaǵyn fýtboldan myqtylar anyqtalady.
