BQO-da AITV juqtyryp, em qabyldaýdan bas tartqan 10 adam izdestirilip jatyr
ORAL. KAZINFORM — Batys Qazaqstan oblysynda 1 qazandaǵy málimet boıynsha, dıspanserlik esepte turǵan, alaıda antıretrovırýstyq (ARV) terapııany qabyldamaǵan 10 patsıent medıtsınalyq baqylaýdan tys qalǵan.
BQO densaýlyq saqtaý basqarmasynan málim etkenindeı, bulardyń qatarynda jumys babymen kórshiles memleketterge nemese Qazaqstan Respýblıkasynyń basqa óńirlerine ketken, sondaı-aq turǵylyqty jeri belgisiz adamdar bar. Alaıda olar oblystaǵy medıtsınalyq uıymdardan esepten shyqpaǵan.
Atalǵan patsıentterdiń ornalasqan jerin anyqtaý jáne medıtsınalyq baqylaýǵa qaıta tartý maqsatynda kóshi-qon qyzmetimen, polıtsııa departamentimen birlesip jumys júrgizilip jatyr. Sonymen qatar halyqqa qyzmet kórsetý ortalyqtary arqyly azamattyq hal aktilerin tirkeý derekteri jáne medıtsınalyq aqparattyq júıeler negizinde izdestirý sharalary júzege asyrylý ústinde.
- ARV terapııasyn qabyldaýdan bas tartqan patsıenttermen emdi qaıta bastaý jáne medıtsınalyq baqylaýǵa tartý maqsatynda mýltıdıstsıplınarlyq top jumys isteıdi. Onyń quramyna dáriger, psıholog, áleýmettik qyzmetker jáne patronajdyq meıirger kiredi, - dep habarlady vedomstvodan.
Eske sala keteıik, budan buryn BQO-da 40-tan astam adamnyń AITV ınfektsııasyn juqtyrǵany tirkelgenin jazǵan edik.
