BQO-da AITV ınfektsııasyn juqtyrǵandardyń basym bóligi Oralda tirkelip otyr
ORAL. KAZINFORM — Batys Qazaqstan oblysynda 1996 jyldan bastap kúni búginge deıin adamnyń ımmýn tapshylyǵy vırýsy (AITV) ınfektsııasyn juqtyrǵan 1 231 adam tirkeldi.
Oblystyq AITV ınfektsııasynyń aldyn alý ortalyǵynyń dırektory Nurlybek Mustaevtyń óńirlik kommýnıkatsııalar ortalyǵy alańynda ótken brıfıngte málim etkenindeı, bıylǵy alty aıda jańadan 25 adamnyń aýyrǵany anyqtaldy, degenmen bul ótken jyldyń osy kezeńimen salystyrǵanda, 44,4 paıyzǵa tómen.
Nurlybek Ermekulynyń sózine qaraǵanda, jańadan syrqattanǵandardyń 19-y nemese 76 paıyzy Oral qalasynyń úlesine tıedi. Sonymen qatar Bórli aýdanynda 3, Báıterek, Syrym jáne Bókeı ordasy aýdanynda 1 derekten belgili boldy.
— AITV juqtyrǵandardyń 36 paıyzy — 40-49, 28 paıyzy — 30-39, 12 paıyzy — 20-29, 8 paıyzy — 50-59 jas aralyǵyndaǵylar. Al 16 paıyzy — 60-tan asqandar. Bul ınfektsııanyń negizinen eńbekke qabiletti jastaǵy adamdar arasynda anyqtalatynyn kórsetedi. Áleýmettik mártebesi jaǵynan alǵanda, 48 paıyzy — jumys isteıtin azamattar, 36 paıyzy — jumyssyzdar, 16 paıyzy — zeınetkerler. Sondaı-aq patsıentterdiń 64 paıyzy erler bolsa, 36 paıyzy — áıelder, — deıdi Nurlybek Mustaev.
Onyń aıtýynsha, aýyrǵandardyń 64 paıyzy jynystyq, 32 paıyzy ınektsııalyq esirtkini qoldanýmen baılanysty parenteraldyq jolmen juqtyrǵan.
Jyl basynan beri óńirde AITV-nyń anadan balaǵa berilýiniń birde-bir deregi tirkelgen joq. Oblysta júkti áıelderdi jáne olardyń jynystyq seriktesterin AITV ınfektsııasyna tekserý qadaǵalanady. Bul yqtımal qaýipterdi der kezinde anyqtaýǵa jáne júktilik pen bosanýdyń qaýipsiz ótýin qamtamasyz etýge múmkindik beredi. Bıyl AITV ınfektsııasymen ómir súretin 4 júkti áıel medıtsınalyq baqylaýda bolyp, deni saý balalardy dúnıege ákeldi.
AITV ınfektsııasy anyqtalǵan barlyq patsıentke qatysty epıdemııaǵa qarsy is-sharalardyń tolyq kesheni júrgizildi. Epıdemıologııalyq tekserý uıymdastyrylyp, baılanysta bolǵan adamdar tekserildi. Patsıentterdiń bári dıspanserlik esepke alynyp, olar tegin medıtsınalyq kómektiń kepildendirilgen kólemi aıasynda emdeledi. Eń aldymen retrovırýsqa qarsy terapııany qabyldaıdy.
— Alty aıda oblys boıynsha 62 859 adam AITV ınfektsııasyna tekserildi. Sonymen qatar negizgi top ókilderi úshin oblystyq AITV ınfektsııasynyń aldyn alý ortalyǵynda «Senim pýnkti» men «Dostyq» kabıneti jumys isteıdi. Munda adamdar tegin jáne jasyryn túrde AITV-ǵa ekspress-testileýden ótedi. Mamandar keńesin alyp, V jáne S vırýstyq gepatıtterine, jynystyq jolmen beriletin ınfektsııalarǵa tekseriledi. Sondaı-aq medıtsınalyq kórsetilimder boıynsha qajetti emderin alady. Bul bólimshelerdiń qyzmeti AITV ınfektsııasyn anonımdi túrde erte anyqtaýǵa, onyń taralýynyń aldyn alýǵa jáne negizgi toptar úshin medıtsınalyq kómektiń qoljetimdiligin arttyrýǵa baǵyttalǵan, — dep qosty Nurlybek Mustaev.
Eske sala keteıik, budan buryn Batys Qazaqstanda 12 adamnyń AITV ınfektsııasyn juqtyrǵanyn jazǵan edik.
