BQO-da «Agrobıznes - 2020» baǵdarlamasyn júzege asyrý barysynda 2,2 mlrd. astam teńgege zańbuzýshylyq anyqtaldy
ORAL. QazAqparat - BQO boıynsha tekserý komıssııasy óńirde «Agrobıznes - 2020» baǵdarlamasyn júzege asyrý barysyna tekserý júrgizgen kezde 2,2 mlrd. astam teńgeniń zańbuzýshylyǵyn anyqtady, dep habarlaıdy QazAqparat.
BQO boıynsha tekserý komıssııasynyń múshesi Meıramhan Qydyrbaevtyń aıtýynsha, oblystyq aýyl sharýashylyǵy basqarmasynda, sondaı-aq aýdandar men birqatar iri kásiporyndarda 2013 jyldan bıylǵy birinshi jartyjyldyqty qamtyǵan qarjylaı tekserý júrgizilgen. Aýdıt barlyǵy 10 mlrd. 914 mln. teńgeni qamtysa, sonyń 2 mlrd. 217 mln. teńgesi boıynsha zańbuzýshylyqtyń oryn alǵandyǵy belgili boldy. Atap aıtqanda, astyq óńdeý kásiporyndaryna demeýqarjy durys tólenbegen, óńirlik turaqtandyrý qoryn qalyptastyrý, memlekettik satyp alý rásimderin ótkizý kezinde de zańbuzýshylyqtarǵa jol berilgen. Mysaly, «Oral» áleýmettik-kásipkerlik korporatsııasyna turaqtandyrý qoryn qalyptastyrý úshin 840 mln. teńge bólingen. Bul qarjyǵa kúrt qymbattaýy múmkin azyq-túlik ónimderi satyp alynýy tıis bolatyn. Alaıda qarjy bankterde birneshe esepshotta jyldan astam ýaqyt boıy qozǵaýsyz jatyp, 44 mln. astam teńge tabys alynǵan. Azyq-túlik aqyry alynbaǵan, sonyń áserinen bıyl jazda qanttyń kúrt qymbattaýy turǵyndarǵa ońaı tıgen joq.
Oblystyq aýyl sharýashylyǵy basqarmasy tarapynan 600 tonnadan astam astyq ótkizý úshin qos operator «Aqas» JShS men «Beles-Agro» JShS-yna bólingen 2 mln. astam teńge demeýqarjynyń jumsalýy da baqylanbaǵan. Arzandatylǵan un áleýmettik nan óndirý úshin qajet edi, bul jumys oryndalmaǵan. Aýdıt qorytyndysy boıynsha astyqty jeńildetilgen baǵamen ótkizý nemese qarjyny bıýdjetke keri qaıtarý usynyldy.
«Tekseris qorytyndysy oblys ákimi men oblystyq máslıhatqa jiberildi. Al oblystyq aýyl sharýashylyǵy basqarmasy men aýdan ákimdikterine zańbuzýshylyqtardy joıý jóninde uıǵarymdar berildi. Bıýdjet jáne basqa zańnamany buzǵan laýazymdy qyzmetkerlerdiń jaýapkershiligin qarap, artyq tólengen demeýqarjyny qaıtarý da usynyldy», dedi M.Qydyrbaev.
