BQO-da aǵyn sýǵa baılanysty eldi mekenmen kólik qozǵalysy toqtatyldy

ORAL. KAZINFORM – Qaratóbe aýdany Qarakól aýyldyq okrýgine qarasty Aqtaısaı eldi mekeni mańyndaǵy ótkeldiń ústinen qar sýy ekinshi ret ótti.

Qaratóbe aýdany ákiminiń orynbasary Muhtar Shaıjanovtyń málim etkenindeı, sý Taıan ózenindegi ótkeldiń ústinen 15 naýryz kúni ótti. Sodan keıin 16 naýryzda kúndiz basylǵanymen, keshke qaraı qaıtadan sý óte bastady.

- Oqıǵa ornynda táýlik boıy kezekshilik uıymdastyryldy. Sozylmaly aýrýy bar adamdardy, aıaǵy aýyr áıelderdi aýdan men oblys ortalyǵyna jetkizdik. Aýyl men aýdan ortalyǵy arasyndaǵy kólik qozǵalysy ýaqytsha toqtatyldy. Jaǵdaıdy búgin tańda taǵy bir baǵamdaıtyn bolamyz. Aqtaısaı bıikte ornalasqandyqtan, eldi mekenge qaýip joq, - dedi Kazinform tilshisine M.Shaıjanov.

Turǵyndardyń sózine qaraǵanda, osyndaı jaǵdaı jyl saıyn kóktemde qaıtalanady.

– Bizdiń aýyldyń saıy tereń. Sondyqtan sý Aqtaısaıǵa kirmeıdi. Biraq sol saıda topyraqtan salynǵan ótkel bar. Sony jylda sý shaıyp ketedi. Bıyl da solaı bolyp otyr. Aýdanmen eki ortada greıder jol bar, sonyń aýyldan bastap 11 shaqyrymyna qum-qıyrshyq tas qospasy durys tóselmegen. Ezilip, balshyq bolyp ketedi. Kóktem men kúzde óte qıyn, - dedi Aqtaısaı aýylynyń turǵyny Ǵabıt Baınııazov.

Eske sala keteıik, budan buryn Jaıyq ózenindegi sý deńgeıi bir táýlikte Oralda 40 santımetrge kóterilgenin jazǵan bolatynbyz.

Batys Qazaqstanda aýyl mańyndaǵy kópirdi sý shaıyp ketti.