BQO-da aǵaıyndy eki jigit fıtozerthana uıymdastyrdy degen kúdikke ilindi
ASTANA. KAZINFORM — Batys Qazaqstan oblysynda polıtseıler quramynda esirtki bar ósimdikterdi ósirýge arnalǵan jasyryn fıtozerthananyń qyzmetin áshkereledi, dep habarlaıdy Polisia.kz.
Aqpan aıynda jedel-izdestirý is-sharalary barysynda Oral qalasynda qarasora tuqymdas ósimdikterdi zańsyz ósirdi degen kúdikpen aǵaıyndylar ustaldy.
— Olardyń biriniń jeke úıinen jeldetý júıesi men jaryqdıodty shamdarmen jabdyqtalǵan, qarasora ósirýge arnalǵan jasyryn jertóle anyqtaldy. Oqıǵa ornynan 7 túp ósimdik, býyp-túıilgen ósimdik tektes zat, ósirýge arnalǵan qural-jabdyqtar jáne 14 mıllıon teńgeden astam aqsha tárkilendi, — delingen habarlamada.
Ekinshi kúdiktiniń páterinen arnaıy jabdyqtalǵan eki jylyjaı-shatyr tabyldy. Onda 22 túp qarasora, paketter men ydystarǵa salynǵan ósimdik tektes zattar, sondaı-aq arnaıy qural-jabdyqtar tárkilendi.
Buǵan deıin Almatyda 20 jastaǵy kýrerden 2,5 keli esirtki tárkilengenin jazǵan bolatynbyz.
