BQO-da aǵasyn óltirgen turǵyn 11 jylǵa sottaldy
ORAL. QazAqparat – BQO qylmystyq ister jónindegi mamandandyrylǵan aýdanaralyq sotynda E.Otarovqa qatysty úkim shyqty, dep habarlaıdy QazAqparat tilshisi.
Sýdıa Shara Zaınýllınanyń málim etkenindeı, is beınebaılanys júıesi arqyly qaralyp, E.Otarov QR QK 99-baby 1-bóligine (adam óltirý) sáıkes aıypty dep tanyldy.
Asa aýyr qylmys jasaǵany úshin E.Otarov 11 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge sottaldy.
Sot talqysynda anyqtalǵanyndaı, ótken jyly 3 jeltoqsan kúni saǵat 16.00 shamasynda E.Otarov óziniń ákesi T.Otarov, aǵasy (ákesiniń inisi) A.Otarov jáne T.Galbıevpen (A.Otarovtyń tanysy) birge jeke tasymaldaýmen aınalysatyn S.Işenkonyń «Volksvagen Passat» avtokóligimen Peremetnyı aýylynan Oral qalasyna jolǵa shyqqan.
Sapar barysynda burynnan alakóz bolyp júrgen E.Otarov pen A.Otarov kelise almaı, bir-birine jaǵymsyz sózder aıtqan.
Oral qalasyna jetkennen keıin aǵasynyń sózine shamdanǵan E.Otarov júrip kele jatqan avtokóliktiń kiltin basqarý júıesinen sýyryp alyp, syrtqa shyqqan. Sosyn A.Otarov otyrǵan jolaýshylar jaǵyndaǵy artqy esikti ashyp, aǵasynyń sol jaq keýdesine bir ret pyshaq suqqan. A.Otarov barynsha qorǵanyp, avtokólikten túsip, qashyp, shamamen 100 metrdeı júrgennen keıin qulap, kóz jumǵan.
Sotta E.Otarov kinásin tolyq moıyndady.
Sot úkimi zańdy kúshine engen joq.
Eske sala keteıik, budan buryn Oralda keıýana men onyń múgedek ulyn óltirgen kúdiktiler ustalǵanyn jazǵan bolatynbyz.
