BQO-da aǵasynyń malyn joıyp jibergen lýdoman baqtashy sottaldy
ORAL. KAZINFORM — Tasqala aýdandyq sotynda ózine senip tapsyrylǵan bóten múlikti ıemdený nemese ysyrap etý boıynsha aıyptalǵan baqtashyǵa qatysty úkim shyqty.
BQO sotynyń baspasóz qyzmetinen málim etkenindeı, atalmysh turǵyn aýyzsha kelisim negizinde 2025 jyldyń tamyz aıynan 13 qazanǵa deıin baqtashy retinde aǵasyna tıesili 90 bas qoıdy baqqan.
Qumar oıyndarmen turaqty áýestengen baqtashy býkmekerlik keńsege udaıy bás tigip, birte-birte qarjylyq qıyn jaǵdaıǵa tap bolǵan. Sodan tanystarynan qaryzǵa aqsha alyp, ony tolyǵymen qumar oıyndarǵa jumsaǵan. Qaryzdaryn óteı almaı, aqsha qajet bolǵandyqtan, ózine senip tapsyrylǵan múlikti urlaýǵa bekingen. Osy maqsatpen 2025 jyldyń qyrkúıek aıy men 13 qazan aralyǵynda múlik ıesiniń tarapynan baqylaýdyń bolmaýy men senimin paıdalanyp, qoılardy jasyryn túrde túrli adamdarǵa arzandatylǵan baǵamen ótkizgen.
Túsken qarajatty býkmekerlik keńsege stavka qoıyp, qaryzdaryn óteýge jumsap, nátıjesinde jábirlenýshige 4 mln 840 myń teńge kóleminde shyǵyn keltirgen.
— Sottalýshy kinásin tolyq moıyndap, jasaǵan áreketine ókinish bildirip, óziniń qumar oıyndarǵa táýeldi bolǵandyqtan, bás tigetinin rastady. Jábirlenýshi sottalýshyny bas bostandyǵynan aıyrmaýdy jáne azamattyq talabyn qaraýsyz qaldyrýdy surady. Sot er adamdy kináli dep tanyp, múlkin tárkileýsiz eki jyl alty aıǵa bas bostandyǵynan shekteý jazasyn taǵaıyndady. Úkim zańdy kúshine endi, — dep habarlady vedomstvodan.
Eske sala keteıik, budan buryn BQO-da shekarany zańsyz kesip ótken úsh shetel azamaty sottalǵanyn jazǵan edik.
