BQO-da adasyp ketken qoıshy qutqaryldy
ORAL. QazAqparat - Batys Qazaqstan oblysynda boran kezinde adasyp ketken qoıshy qutqaryldy, dep habarlaıdy «QazAqparat» tilshisi.
Oblystyq TJD Jedel qutqarý jasaǵynyń bas qutqarýshy-psıhology Leıla Ábdirahmanovanyń aıtýynsha, Aqjaıyq aýdany Tompaq aýylynyń turǵyny 22 jeltoqsan kúni tańerteń qoı baǵýǵa shyqqan. Áıtse de kúndiz boran bastalyp, er adam baǵytynan aırylyp, adasyp ketken. Bul týraly málimet qutqarýshylarǵa 23 jeltoqsanǵa qaraǵan túngi saǵat 00.40-ta túsken.
Aýdan ortalyǵy Chapaev aýylynda ornalasqan №6 jedel qutqarý jasaǵynan bes adam men arnaıy avtomobıl izdestirý jumystaryna jumyldyrylǵan. Sondaı-aq Aqjaıyq aýdany órt sóndirý bóliminen taǵy bir avtokólik qosylǵan. Qoıshyny izdeýge jergilikti mekemeler qyzmetkerleri men turǵyndar da óz avtokólikterimen shyǵyp, túngi ýaqytta qolaısyz aýa raıyna qaramastan, Tompaqtan Taıpaq aýylyna deıingi aralyqty súzip shyqty.
Saǵat 06.20-da ábden tońǵan er adam Tompaq aýylynan jeti shaqyrym jerden tabyldy. Qutqarýshylar oǵan alǵashqy járdem kórsetkennen keıin qoıshy úıine jetkizildi.
