BQO-da adamdardyń bir-birine koronavırýs juqtyrýy jıilep otyr

Bul týraly BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaev brıfıngte málim etti, dep habarlaıdy QazAqparat tilshisi.

Aýyrǵandardyń basym kópshiligi nemese 89 paıyzy Oral qalasynda shoǵyrlanǵan. Sondaı-aq oblystyń jeti aýdanynda koronavırýs juqtyrǵandar anyqtaldy.

Sońǵy úsh kúnde aýrýdyń ósý deńgeıi 7 paıyzdan 9,2 paıyzǵa jetti. Munyń bir sebebi – buryn aýyrǵandarmen qarym-qatynasta bolǵandardyń bári tekserilýde.

Syrqattanǵandardyń 57,6 paıyzy nemese 265-i – syrttan kelgender. Sonyń ishinde 192-si – Reseıdiń Samara, Saratov oblysy arqyly elge jetkender. Germanııa men Belarýstan kelgen bir-bir adamnan aýrý tabyldy.

Teńiz kenishinen kelgender arasynan 71 adamnyń dertke shaldyqqany belgili boldy. Ókinishke qaraı, dene qyzýy kóterilse de, qaýipsizdikti saqtamaý saldarynan olardyń aýrýdy óz týystaryna, áıeli, balalaryna juqtyrǵany anyqtaldy. Sondaı tórt aýrý oshaǵynda 17 koronavırýs oqıǵasy tirkeldi.

Qarym-qatynasta bolǵan 189 adamnan aýrý tabyldy.

Ómir bolǵan soń, ólim-jitim kezdespeı turmaıdy. Syrym jáne Shyńǵyrlaý aýdanynda jerleý rásimine kóp adamnyń jınalǵany anyqtaldy.

Syrym aýdanynda tórt adam dertke shaldyqty. Sonyń ishinde bireýi óz otbasyndaǵy eki adamǵa jáne medbıkege aýrý juqtyrdy. Aýrý belgileri baıqalǵan boıda aýrýhanaǵa barmaı, jedel járdem shaqyrsa, indet olaı taralmas edi. Qazirgi kezde aýdanda karantın jarııalanyp, naýqastarmen qarym-qatynasta bolǵandar tekserilip, synama teris nátıje kórsetti.

Sonymen qatar Shyńǵyrlaý aýdanynda bir adamnan koronavırýs tabyldy. Endi epıdemıolog mamandar sol jerleý rásimine qatysqan adamdardy anyqtap, tekserý jumystaryn júrgizip jatyr.

«Eń basty shart – adamdar kóshege shyqqanda, ara qashyqtyqty saqtaýy, kópshilik jıyndarǵa barmaýy kerek. Mysaly, Oraza aıy men aıt kúnderi adamdardyń bir-birin qonaqqa shaqyrýy jıiledi. Sondaı-aq avtobýstarǵa mingender, bazar, dúkenderge barǵandar ishinde betperdesiz júrgender az emes. Jolaýshy tasymaldaýshy kásiporyndar da dezınfektsııalyq, sanıtarlyq talaptardy saqtaı bermeıdi. Eger olar muny jalǵastyrsa, sol baǵyttaǵy avtobýstar qozǵalysyn toqtatýǵa deıin sheshim qabyldanatyn bolady. Qoryta aıtsaq, 15 maýsymǵa deıin uzartylǵan karantındik talaptardy saqtaı alsaq qana shekteý sharalaryn jeńildetemiz», dedi M.Aryspaev.

Eske sala keteıik, budan buryn BQO-da eki aýyl karantınge jabylyp, blokpostar qoıylǵanyn jazǵan bolatynbyz.