BQO-da adam ólimine soqtyrǵan birneshe jol apaty boldy
ORAL. QazAqparat – Batys Qazaqstan oblysynda adam ólimine soqtyrǵan birneshe jol apaty boldy, dep habarlaıdy QazAqparat.
BQO polıtsııa departamentiniń baspasóz qyzmeti málim etkenindeı, sonyń ekeýi Oral-Atyraý jolynyń boıynda oryn aldy.
Báıterek aýdany aýmaǵynda 14 jeltoqsan kúni saǵat 18.30-da Oral-Atyraý jolynyń 29-shaqyrymynda 53 jastaǵy júrgizýshi «Nıva» avtokóligimen kele jatyp, «KamAZ» avtokóliginiń janynda turǵan 40 jastaǵy júrgizýshini qaǵyp ketti. Sonyń saldarynan ol jedel járdem kóliginde kóz jumdy.
Sondaı-aq 18 jeltoqsan kúni shamamen saǵat 18.35-te atalǵan jolda 39 jastaǵy júrgizýshi «VAZ» avtokóligimen basyp ozamyn dep, qarsy kele jatqan «Aýdımen» soqtyǵysýǵa jol berdi. Saldarynan «VAZ» avtokóliginiń jolaýshylary Aqjaıyq aýdandyq ortalyq aýrýhanasyna jetkizildi. 43 jastaǵy áıel túrli jaraqat alsa, 57 jastaǵy áıel aýrýhanada qaıtys boldy.
Taǵy bir oqıǵa Oral qalasynda boldy. 16 jeltoqsan kúni shamamen saǵat 18.30-da 42 jastaǵy júrgizýshi «Toyota Corolla» avtokóligimen N.Nazarbaev dańǵylymen kele jatyp, 20 jastaǵy jaıaý júrginshini qaǵyp ketti. Jigit oblystyq kópbeıindi aýrýhanaǵa jetkizilgenimen, 9 saǵattan keıin jansaqtaý bóliminde jan tapsyrdy.
Marqumdardyń deneleri sot-medıtsınalyq saraptamaǵa jiberilip, avtokólikter arnaıy turaqqa qoıyldy.
Qazirgi kezde úsh oqıǵa boıynsha QR QK 345-baby 3-bóligine sáıkes tergeý amaldary júrgizilýde.
Eske sala keteıik, budan buryn Oralda avtokólik órtenip, kúıik shalǵan er adamnyń aýrýhanaǵa jetkizilgenin jazǵan bolatynbyz.
