BQO-da 950 mln astam teńgeniń tyıym salynǵan zattary tıelgen 14 júk kóligi ustaldy
BQO boıynsha memlekettik kirister departamenti túsindirý jumystary basqarmasynyń basshysy Aıman Qýanovanyń málim etkenindeı, atalmysh júk kólikteri Almaty qalasynan Reseıdiń Penza oblysyna bara jatqan.
Júk bólikterin qaraý kezinde shetke shyǵarýǵa tyıym salynǵan taýarlar, atap aıtqanda, jeke qorǵanys quraldary, medıtsınalyq, qorǵaný jáne respıratorlyq maskalar, dárilik zattar, baılanyssyz termometrler, qolǵaptar, qorǵanys kózildirikteri, qorǵaý kostıýmderi, respıratorlyq maskalarǵa arnalǵan súzgiler, antıseptıkter, qorǵanys şetkalary tabyldy.
Sonymen qatar eksportqa shyǵarý úshin ruqsat berý qujattary joq medıtsınalyq qural-jabdyqtardyń da bar ekendigi anyqtaldy.
A.Qýanovanyń sózine qaraǵanda, zańdy tulǵa medıtsınalyq taýarlardy ótkizýge qajetti ruqsat berý qujattaryn bermegen. E-lıtsenzııalaý aqparattyq júıesinde de málimetter joq bolyp shyqty.
Júk qujattaryna monıtorıngi júrgizý barysynda elektrondyq shot-faktýralardyń QR Qarjy mınıstrligi Memlekettik kirister komıtetiniń EShF aqparattyq júıesinde tirkelmegeni belgili boldy. Sondyqtan usynylǵan qujattar jalǵan bolyp tabylady.
Taýarlardyń jalpy somasy 950 mln teńgeden asady.
«Atalǵan derekter zańdy tulǵanyń qoldan jasalǵan elektrondy shot-faktýralaryn usyný arqyly naqty alynǵan kiristerdi jasyrý jáne salyq tóleýden jaltarý nıeti bolǵandyǵyn kórsetedi. Materıaldar protsessýaldyq sheshim qabyldaý úshin BQO boıynsha ekonomıkalyq tergeý departamentine berildi. Ónim jetkizýshige qatysty kedendik tekserý bastaldy», dedi A.Qýanova.
