BQO-da 95 aýyl ákimi saılandy
ORAL. QazAqparat - Batys Qazaqstan oblysynda 7 jáne 9 tamyz kúnderi aýdandyq, qalalyq máslıhat depýtattary qatysqan tańdaýshylar otyrysynda 95 aýyldyq okrýg ákimi saılandy. Bul týraly óńirlik kommýnıkatsııalar qyzmetinde oblystyq saılaý komıssııasynyń tóraǵasy Ǵaısa Qapaqov málim etti, dep habarlaıdy «QazAqparat» tilshisi.
Onyń aıtýynsha, aýyl ákimi saılaýynda barlyǵy 289 úmitker tirkelip, bir orynǵa úsh adamnan keldi. Olardyń 10-y saılaýǵa túsýden óz erkimen bas tartsa, qalǵan 279-y dodaǵa at qosty. Aldyn ala málimetter boıynsha saılanǵandardyń 88-i nemese 92,6 paıyzy - er, jeteýi (7,4 paıyz) - áıel adamdar.
Óńirde 151 aýyldyq okrýg bolsa, sonyń 95-inde saılaý ótti, qalǵandarynda ákimderdiń qyzmet etý merzimi bitken joq.
Tańdaýshylar otyrysyna 169 depýtattyń 150-i nemese 88,8 paıyzy qatysyp, óz tańdaýlaryn jasady. Saılaýǵa 24,201 mln. teńge qaraldy. Bylaısha aıtqanda, ár aýyldyq okrýgke 841 myń teńge, ár úmitkerge úgit-nasıhat jumystaryn júrgizý úshin 67 myń teńge bólindi.
Aıta keteıik, saılanǵan ákimderdiń 54-i (56,8 paıyzy), ıaǵnı teń jartysynan astamy - burynnan osy qyzmetti atqaryp kelgender.
