BQO-da 94 myńnan astam adam qan aınalymy júıesi aýrýlarymen esepte tur

ORAL. KAZINFORM — Batys Qazaqstan oblysynda 94 192 adam qan aınalymy júıesi aýrýlarymen tirkelgen.

BQO kardıologııalyq ortalyǵynyń dırektory Arman Baıdeýovtiń óńirlik kommýnıkatsııalar qyzmeti alańynda ótken brıfıngte málim etkenindeı, mundaı aýrýlarmen syrqattanýshylyq, múgedektik jáne ólim-jitim kórsetkishi álemde aldyńǵy orynda. Bul mıokard ınfarktisi, sozylmaly júrek jetkiliksizdigi, ómirge qaýip tóndiretin arıtmııa, ınsýlt sııaqty asqynýlarǵa ákeledi.

Onyń sózine qaraǵanda, bıylǵy on aıda turǵyndardy skrıngtik tekserýmen qamtý 99,5 paıyzǵa jetken. Sonyń 10,3 paıyzynan dert anyqtalǵan. 99,3 paıyzy baqylaýǵa alynǵan.

«Oblys boıynsha eresekterge arnalǵan kardıologııalyq 144 tósek-oryn bar. Sondaı-aq 12 kardıohırýrgııalyq, 54 kardıologııalyq ońaltý, 10 kardıohırýrgııalyq ońaltý tósekteri eresekterge arnalǵan. Jyl saıyn statsıonarda 4 myńnan astam patsıent em alady. Júrekke 200-den astam ashyq ota jasalyp, 3 myńnan astam koronarografııalyq zertteý júrgiziledi. Oǵan qosa 100-den astam joǵary tehnologııalyq júrek otasy jasalyp, 2 myń konsýltatsııalyq-dıagnostıkalyq qyzmet kórsetiledi. Qan aınalymy júıesiniń aýrýlary boıynsha ólim-jitim men múgedektiktiń aldyn alý maqsatynda sheberlik saǵattary sııaqty is-sharalar turaqty ótkizilip keledi. Sonymen qatar otalardyń barlyq túrlerin kardıologııalyq ortalyq mamandary óz betinshe júrgize bastady», deıdi A.Baıdeýov.

Onyń málimdeýinshe, barlyq derlik qan aınalymy júıesi aýrýlarynyń paıda bolýyna ateroskleroz áser etedi. Osy baǵytta Densaýlyq saqtaý mınıstrligimen dıslıpıdemııa boıynsha jol kartasy qolǵa alynǵany belgili. Munyń aıasynda oblysta 9 dıslıpıdemııa kabıneti ashylyp, medıtsınalyq mekemeler dárigerleri oqytyldy.

«Birqatar problemalyq máselelerdi aıta ketýge bolady. Medıtsınalyq jabdyqtar máselesi respýblıkalyq jáne jergilikti bıýdjet esebinen sheshilýde. Kadr tapshylyǵyn sheshý oblys ákimdigi tarapynan qoldaý tapty. Oblystyq kardıologııalyq ortalyqtyń ǵımaraty kúrdeli jóndeýdi qajet etedi. Bul rette jańa kardıologııalyq ortalyqtyń jobalyq-smetalyq qujattamasy jasaldy. MÁMS júıesinde saqtandyrýdyń bolmaýy da azamattardy emdeý kezinde qıyndyq týǵyzady», dedi A.Baıdeýov.

Eske sala keteıik, budan buryn brýtsellezden keler qaýip-qater qandaı ekendigin jazǵan bolatynbyz.