BQO-da 931 myń gektar jer keri qaıtaryldy
ORAL. QazAqparat - Memleket basshysy Nursultan Nazarbaevtyń ıgerilmegen jerdi memleket menshigine qaıtarý týraly tapsyrmasyna sáıkes Batys Qazaqstan oblysynda 931 myń ga jer qaıtaryldy. Bul týraly oblys ákimi Altaı Kólginovtiń tóraǵalyǵymen ótken, bos jatqan jerlerdi ıgerý men oblys ortalyǵynda tıimdi baǵamen azyq-túlik ónimderin usynatyn jármeńkeler uıymdastyrý máselesi talqylanǵan jıynda BQO jer qatynastary basqarmasynyń basshysy Álııa Muhanbetjanova málim etti, dep habarlaıdy «QazAqparat» tilshisi.
Oblys ákimi A.Kólginov jerdiń paıdalanylýy men qorǵalýyn baqylaý basqarmasynyń jumysyna syn aıtyp, tıisti sharalardy qoldana otyra almaı otyrǵanyn qatań eskertti. Bul rette jer qatynastary basqarmasymen birge ıgerilmegen jerlerdi qaıtarý jumystaryn kúsheıtý kerektigin aıtyp, atalǵan basqarmalardan aı saıyn esep alatynyn atap ótti.
-Elbasy tapsyrmasyna sáıkes ırrıgatsııalyq qurylymdardy qaıta jańartyp, óńirde mal sharýashylyǵynyń qýatyn arttyrý maqsatynda jumystar atqarylýda. Sýarmaly jerlerdiń kólemi byltyrǵy jylmen salystyrǵanda eki esege ósti. Munyń bári ıgerilmegen jerlerdi kádege jaratý úshin jasalyp jatyr. Demek, buryn ıgerilmegen jerler naqty qolynan is keletin azamattarǵa konkýrstyq negizde ashyq, jarııaly túrde berilýi tıis. Investorlar úshin kásipkerlik basqarmasymen birigip atqaratyn ister barshylyq, - dedi oblys ákimi.
Oblys ortalyǵynda turaqty túrde ótkizilip kele jatqan jármeńkeniń uıymdastyrylýyna kóńili tolmaıtynyn jetkizgen A.Kólginov: -Aýyl sharýashylyǵy jármeńkesin bir jerde ǵana uıymdastyryp qoımaı, qalada taǵy birneshe oryndar bolýy qajet. Turǵyndarǵa tıimdi baǵa usynylýyn qadaǵalaý kerek. Naryqtaǵy baǵadan jármeńkedegi azyq-túlik baǵalary tómen bolýy mindetti. Baqylaý bolmaǵan soń keıbir ónimderdiń baǵasynda bazardaǵydan aıyrmashylyq joq. Baqylaýdy kúsheıtý kerek. Osy jumystardy qala ákimine tapsyramyn, - dedi.
