BQO-da sanaq kezinde 92 myńnan astam úı sharýashylyǵyn qamtý josparlanyp otyr
ORAL. KAZINFORM – Batys Qazaqstan oblysynda ulttyq aýyl sharýashylyǵy sanaǵy kezinde barlyq respondent qamtylady.
QR Strategııalyq josparlaý jáne reformalar agenttigi Ulttyq statıstıka bıýrosy BQO boıynsha departamentiniń basshysy Bolat Meshelovtiń óńirlik kommýnıkatsııalar qyzmeti alańynda ótken brıfıngide málim etkenindeı, negizgi sanaq kezeńi (1 tamyz – 20 qazan) bastalǵanǵa deıin BQO boıynsha lıstıng retinde Aqsaı qalasynda 1-30 maýsym aralyǵynda jeke qosalqy sharýashylyqtaryn aldyn ala aralaý júrgiziledi.
Bolat Tileýqabylulynyń sózine qaraǵanda, sanaq barysynda Batys Qazaqstan oblysynda barlyǵy 92 690-ǵa jýyq úı sharýashylyǵyn jáne 10 504 aýyl sharýashylyǵy óndirýshisin qamtý josparlanǵan.
– Sanaq qyzmetkerleri barlyq respondentti qamtýǵa mindetti. Qatysýdan bas tartylǵan jaǵdaıda zańnamaǵa sáıkes ákimshilik jaýapkershilik qarastyrylǵan. Biz azamattardy sanaqqa sanaly túrde qatysýǵa shaqyramyz. Óıtkeni bul jaı statıstıkalyq shara emes, memlekettik mańyzy bar is, - dedi B.Meshelov.
Departament basshysy Ulttyq statıstıka bıýrosy alynǵan derekterdiń anonımdiligine jáne olardy qatań statıstıkalyq maqsattarda paıdalanýǵa kepildik beretinin atap ótti. Sandar respondenttiń bastapqy derekterin kórsetpeı-aq, jıyntyq túrde óńdeledi jáne jarııalanady. Derekter salyq nemese basqa memlekettik organdarǵa berilmeıdi.
Saýalnama paraǵyn toltyrý kezinde respondent (uıymdasqan sharýashylyq) memlekettik derekter bazasynda derekterdi jańartý úshin alynǵan derekterdi usynýǵa kelisim bere alady. Mysaly, maldyń, tehnıkanyń, jer ýchaskesiniń bolýy jáne t.b.
– Sanaq júrgizý úshin biz jumyssyz azamattar men stýdentter qatarynan, sondaı-aq barlyq nıet bildirgen azamat sanatynan 217-den astam adamdy ıntervıýer retinde jumysqa tartýdy kózdep otyrmyz. Olardy oqytý bıýronyń data Literacy Hub platformasynda uıymdastyrylǵan, onda qatysýshylar úshin ár túrli oqý materıaldary: mátindik qujattar, beınerolıkter jáne beıne slaıdtar qoljetimdi. Oqý aıaqtalǵannan keıin barlyq qatysýshy bilimderi men jumysqa daıyndyǵyn rastaý úshin mindetti testileýden ótýi kerek. Qazirgi tańda qyzmetkerlerdi qabyldaý naýqany júrgizilýde. Intervıýer men nusqaýshy retinde sanaqqa qatysqysy keletinderdiń barlyǵy 1 446 baılanys ortalyǵyna ótinish qaldyra alady. Ótken aptada biz «Qazposhta» AQ-men memorandým jasastyq, onda aýyl sharýashylyǵy sanaǵyna ıntervıýerler retinde poshtashylardy tartý múmkindigin qarastyrdyq, - dedi B.Meshelov.
Departamant basshysynyń málimdeýinshe, barlyq kezeń aıaqtalǵannan keıin 2025 jylǵy jeltoqsanda sanaqtyń aldyn ala nátıjeleri jarııalanady. Sońǵy jıyntyq derekter men analıtıkalyq esepter Ulttyq statıstıka bıýrosynyń saıtynda kópshilikke 2026 jyly usynylady.
Eske sala keteıik, budan buryn ulttyq aýyl sharýashylyǵy sanaǵyn ótkizýge 5,2 mlrd teńge bólingenin jazǵan bolatynbyz.
Sondaı-aq aýyl sharýashylyǵy sanaǵy qaı aılarda júrgiziletini habarlandy.