BQO-da 900 myń balyq qurtshabaǵy qyryldy
ORAL. QazAqparat - Batys Qazaqstan oblysynda jóndeý jumystary saldarynan balyqtar jappaı qyrylyp qaldy, dep habarlaıdy QazAqparat Orman sharýashylyǵy jáne janýarlar álemi komıtetine silteme jasap.
"Batys Qazaqstan oblysynyń aýmaqtyq orman sharýashylyǵy jáne janýarlar álemi ınspektsııasyna keshe Syrym aýdany Toǵanas aýyly mańyndaǵy Sholaqanqaty ózeninde balyqtardyń jappaı qyrylǵany týraly aqparat kelip tústi.Ony tekserý úshin tabıǵatty qorǵaý polıtsııasy men jergilikti atqarýshy organdardyń ókilderi oqıǵa ornyna bardy", - dep habarlady QR AShM Orman sharýashylyǵy jáne janýarlar álemi komıtetiniń resmı ókili Sáken Dildahmet.
Tekserýshiler Sholaqanqaty ózenindegi shlıýzge jóndeý jumystary júrip jatqanyn anyqtady. Jóndeý jumystaryn júrgizý úshin negizgi sýdy aǵyzǵan jáne tereńdigi 15-20 sm bolatyn shalshyq sý qalǵan.
"Sholaqanqaty aýyldyq okrýginiń ákimi jumysshylardyń balyq qurtshabaqtaryn qutqarý úshin barlyq sharalardy jasaǵanyn aıtty. Kelesi kúni aýa temperatýrasy kúrt tómendep, sý qatqan jáne qalǵan balyqtar qyrylǵan. Jalpy aýmaǵy 1800 sharshy metr shalshyq muz bolyp qatty. Shamamen 1 sharshy metrde 500 dana balyq bolǵan", - deıdi resmı ókil.
Aldyn ala boljam boıynsha, 900 myń balyq qurtshabaǵy qyryldy. Olardyń arasynda aqkóz, qyzylqanat, qylyshbalyq, móńke balyqtar bar.
"Atalǵan fakt boıynsha qylmystyq is qozǵaý úshin Syrym aýdanynyń ishki ister bóliminde qujattar rásimdelip jatyr. Janýarlar álemine keltirilgen shyǵyndar keıinirek esepteledi jáne balyqtardyń qyrylýyna aıyptylar jaýap beredi", - dedi S. Dildahmet.
