BQO-da 90 oqýshyǵa 120 myń teńgelik qarjylaı sertıfıkat tabystaldy
ORAL. KAZINFORM — 1 maýsym — Halyqaralyq balalardy qorǵaý kúnine oraı Tuńǵysh Prezıdent atyndaǵy alańda merekelik is-shara uıymdastyryldy. Oǵan oblys ákimi Narıman Tóreǵalıev qatysty.
Aımaq basshysy aldymen jas daryndar galereıasyn tamashalady. Shyǵarmashylyq kórmede shákirtter jarqyn jetistikteri men tyń jobalaryn tanystyrdy. Óskeleń urpaqtyń ǵylymı izdenisteri, ekologııalyq jáne áskerı-patrıottyq baǵyttaǵy bastamalary kópshilik nazaryna usynyldy. Ónerli órender shyǵarmashylyq josparymen bólisti. Sondaı-aq jas qutqarýshylar men tártip saqshylary sap túzep, uıymnyń maqsat-mindetterin baıandady.
Merekelik sharanyń saltanatty sátinde oblys ákimi halyqaralyq jáne respýblıkalyq bilim básekelerinde óńir namysyn qorǵap, kósh basynan kóringen 90 oqýshyǵa alǵys hat pen 120 myń teńge kólemindegi qarjylaı sertıfıkattardy tabys etti.
Aımaq basshysy balalardyń quqyqtaryn qorǵaý, olardyń sapaly bilim alyp, densaýlyǵyn nyǵaıtýyna, shyǵarmashylyq pen sportta shyńdalýyna jaǵdaı jasaý — memlekettik saıasattyń basty basymdyqtarynyń biri ekenin aıtty. Bul baǵytta óńirde aýqymdy jumystar atqarylýda. Máselen, sońǵy 3 jylda 30 mektep salyndy. Onyń 9-y «Keleshek mektepteri» ulttyq jobasy aıasynda boı kóterse, qazirgi tańda 8 bilim ordasynyń qurylysy júrgizilip jatyr.
— Memleket basshysy Qasym-Jomart Kemeluly atap ótkendeı, jas urpaqtyń boıynda «Adal azamat» tujyrymdamasyna saı qaǵıdattardy qalyptastyrý — ortaq mindetimiz. Biz búkil qoǵam bolyp balalarymyzdy eńbekqorlyqqa, ýaqyt talabyna saı izdenýge baýlýymyz qajet. Jas urpaqtyń sapaly bilim, sanaly tárbıe alýy úshin barlyq jaǵdaı jasalyp jatyr. Bul strategııalyq is-sharalar júıeli túrde jalǵasa beredi, — dedi oblys ákimi.
Merekelik is-shara jas ónerpazdardyń kontserttik baǵdarlamasymen túıindeldi.
