BQO-da 90-nan astam kásipkerdiń saýda baǵasyn asyryp satqany belgili boldy
ORAL. KAZINFORM — Batys Qazaqstan oblysynda bıylǵy alty aıda áleýmettik mańyzy bar azyq-túlik taýarlaryn ótkizý kezinde saýda ústemesin shekti mólsherden asyrǵany úshin 92 kásipker ákimshilik jaýapkershilikke tartyldy.
BQO saýda jáne tutynýshylardyń quqyqtaryn qorǵaý departamentiniń basshysy Elmıra Qımatovanyń óńirlik kommýnıkatsııalar qyzmeti alańynda ótken brıfıngte málim etkenindeı, olarǵa QR Ákimshilik quqyq buzýshylyq týraly kodeksiniń 204-4-babyna sáıkes shara qoldanyldy.
Elmıra Nurqyzynyń sózine qaraǵanda, sonymen qatar saýda obektilerinde taýar baǵasynyń kórsetilmeýi jáne vıtrınadaǵydan joǵary baǵamen taýar ótkizý derekteri boıynsha 9 kásipkerlik nysany da jazasyz qalǵan joq.
Salynǵan ákimshilik aıyppuldardyń jalpy somasy 1 mln 634,850 myń teńge boldy.
Kásipkerlik sýbektileriniń saýda qyzmetin retteý týraly zańnama talaptaryn, onyń ishinde áleýmettik mańyzy bar azyq-túlik taýarlaryna saýda ústemesiniń belgilengen mólsherin saqtaýyn baqylaý maqsatynda departament apta saıyn saýda obektilerinde baǵa monıtorıngin júrgizedi.
- Osy shilde aıynda monıtorıng barysynda «Oral qus fabrıkasy» JShS men «Aqas» JShS óndirgen S1 sanatyndaǵy jumyrtqalardy ótkizýde birneshe saýda nysanynda saýda ústemesiniń shekti mólsherinen asyrý derekteri anyqtaldy. Qazirgi ýaqytta atalǵan kásipkerlik sýbektilerine qatysty jospardan tys tekserýler júrgizilýde. Tekserý nátıjeleri boıynsha olar ákimshilik jaýapkershilikke tartylady, - dedi E.Qımatova.
Departament basshysynyń aıtýynsha, azamattardyń ótinishterin qaraý nátıjesinde tutynýshylardyń quqyqtaryn qorǵaý týraly zańnama talaptarynyń buzylý derekteri boıynsha jospardan tys 13 tekserý júrgizilip, olardyń qorytyndysy boıynsha kásipkerlik sýbektilerine qatysty ákimshilik is qozǵaldy.
Ákimshilik quqyq buzýshylyq týraly kodeksiniń 802-babyna sáıkes tutynýshylardyń quqyqtaryn qorǵaý týraly zańnamany buzý derekterine sáıkes 21 kásipkerlik sýbektisine qatysty ákimshilik is qozǵaldy. Olarǵa 1 mln 267,423 myń teńge aıyppul salyndy.
- Departament mamandary jyl basynan beri tutynýshylardyń quqyqtaryn qorǵaýǵa baılanysty 31 azamattyq is boıynsha sot talqysyna qatysty. Sonyń 21-inde tutynýshylardyń talaptary qanaǵattandyrylsa, qalǵan azamattyq ister sot óndirisinde qaralýda. Júrgizilgen jumystardyń nátıjesinde departamenttiń járdemimen tutynýshylarǵa 29 mln 950,371 myń teńge qaıtaryldy, - dep qosty E.Qımatova.
Eske sala keteıik, budan buryn Oralda ımporttyq jumyrtqany zańsyz satý derekteri anyqtalǵanyn jazǵan edik.
