BQO-da 90 eldi mekende sý qorǵaý aýmaqtarynyń shekarasy belgilenbek
ORAL. KAZINFORM – 2025 jyly 9 sáýirde qabyldanǵan jańa Sý kodesiniń 133-babyna sáıkes jergilikti atqarýshy organdar eki jyl ishinde eldi mekenderdiń shekaralary sheginde jerústi sý nysandarynyń sý qorǵaý aımaqtary men beldeýleriniń shekaralaryn belgileýge mindetti.
BQO tabıǵı resýrstar jáne tabıǵat paıdalanýdy retteý basqarmasynyń basshysy Marat Moldashevtiń óńirlik kommýnıkatsııalar qyzmeti alańynda ótken brıfıngte málim etkenindeı, óńirde uzyndyǵy 5723 km 48 sý nysanynyń sý qorǵaý aımaqtary men beldeýleri BQO ákimdiginiń «Batys Qazaqstan oblysynyń sý qorǵaý aımaqtaryn, beldeýlerin jáne olardy sharýashylyqta paıdalaný rejımin belgileý týraly» 2017 jylǵy 24 aqpandaǵy № 52 qaýlysymen bekitilgen.
Marat Tóleǵalıulynyń sózine qaraǵanda, ótken jyly 9 sý nysanynyń sý qorǵaý aımaqtary men beldeýleri anyqtalyp, qaýlyǵa kiristirilgen.
- Kúni búginge deıin Jaıyq-Kaspıı basseındik sý ınspektsııasy BQO boıynsha bólimimen birlese otyryp, oblys boıynsha 90 eldi mekende jalpy uzyndyǵy 176,12 km 78 sý nysanynyń sý qorǵaý aımaqtary men beldeýlerin bekitý qajettigi anyqtaldy. Bul maqsatqa bıyl jergilikti bıýdjet esebinen 47,7 mln, 2027 jyly 49,9 mln teńge kózdelgen. Jumystardy 2027 jyldyń 1 shildesine deıin aıaqtaý tapsyrylǵan, - dedi M.Moldashev.
Onyń aıtýynsha, qaýipti kúni buryn anyqtaý maqsatynda Jaıyq, Derkól jáne Shaǵan ózenderindegi avtomobıl kópirlerine sý tasqynyn monıtorıngileý jáne erte habarlaý júıesi ornatyldy. Joba quny – 79,7 mln teńge.
2025–2027 jyldarǵa arnalǵan sý tasqynyna qarsy is-sharalar boıynsha Báıterek aýdany Chırov aýyly Kishi Bykovka ózeninde quny 156 mln teńge turatyn qurylys-montaj jumystary aıaqtaldy. Taǵy bir nysanda «Batysırrıgatsııa» KMM-men ózen arnasyn mehanıkalyq tazalaý jáne keńeıtý jumystary uıymdastyryldy. Sonyń nátıjesinde Syrym aýdanynda Óleńti ózeniniń 5 km ýchaskesi tazalandy.
Eki nysanda jumystar júrip jatyr. Atap aıtqanda, Oral qalasynda Chıchernaıa jáne Shamsýtdınov kóshelerinen aılaqqa deıingi Jaıyq ózeni jaǵalaýyn bekitý, jaǵalaý uzyndyǵy – 670 metr. 2025 jyly 1,6 mlrd teńge bólingen joba bıyl aıaqtalýy tıis.
- Tasqala aýylyndaǵy Derkól ózenin mehanıkalyq tazalaý jáne keńeıtý boıynsha respýblıkalyq bıýdjetten 435 mln teńge qarastyryldy. Qazirgi kezde merdiger uıym retinde «SMÝ 17» JShS anyqtaldy. Oǵan qosa tehnıkalyq qadaǵalaý jumystaryna konkýrs júrgizilip jatyr. Oralda kardıoortalyq mańyndaǵy Derkól ózeni jaǵalaýyn bekitý jobasy boıynsha jobalyq-smetalyq qujattama túzetilip jatyr. Bórli jáne Shyńǵyrlaý aýdandaryndaǵy Shyńǵyrlaý ózeni arnasyn mehanıkalyq tazartý boıynsha JSQ jasaqtalyp, memlekettik saraptamaǵa joldandy. Al Jaıyq-Kóshim sýarý-sýlandyrý júıesiniń Kóshim kanaly men Shaǵan arnasyn «Qazsýshar» RMK Batys Qazaqstan fılıalymen mehanıkalyq tazalaý jumystary júrgizilý ústinde, - dep qosty basqarma basshysy.
Eske sala keteıik, budan buryn sý tasqyny kezinde BQO-da 317 ýaqytsha ornalastyrý pýnktiniń 32 myń adamdy qabyldaı alatynyn jazǵan edik.
Batys Qazaqstan oblysyndaǵy sý qoımalarynyń jaǵdaıy qalaı ekeni habarlandy.