BQO-da 9 aýla otqa oranyp, 64 tonna pishen janyp ketti
BQO TJ departamentiniń baspasóz qyzmeti málim etkenindeı, oqıǵa 12 tamyz kúni Aqjaıyq aýdanynda boldy.
Jaqyn mańdaǵy órt sóndirý bóliminen 80 shaqyrym qashyqta ornalasqan Aqsýat aýylynda Beıbitshilik kóshesinde saǵat 15.58-de qora-qopsy janyp, ol kórshiles turǵan qurylystarǵa aýysqan.
Órt 550 sharshy metrdi aýmaqty sharpyǵan. Barlyǵy 9 aýlada qora-qopsy órtenip, 64 tonna pishen janyp ketti.
«Tilsiz jaýdy» aýyzdyqtaýǵa TJ departamentinen 10 qyzmetker, 2 tehnıka, erikti órt sóndirý qurylymdarynan 50 qyzmetker, 2 tehnıka jumyldyryldy.
Órt saǵat 22.02-de tolyqtaı sóndirildi.
Sondaı-aq 12 tamyz kúni saǵat 11.06-da Oral qalasyna qarasty Krýgloozernyı kentiniń shetinde 120 gektar qurǵaq shóp pen buta jandy. Oqıǵa ornynda jáne TJ departamentinde arnaıy shtab quryldy.
Órtti sóndirýge TJ departamenti (104 qyzmetker, 15 tehnıka), orman sharýashylyǵy mekemesi (20 qyzmetker, 3 tehnıka), erikti órt sóndirý qurylymdary (18 qyzmetker, 3 tehnıka) atsalysty.
Órt saǵat 21.40-ta sóndirildi.
Eske sala keteıik, budan buryn BQO-da er adam jıenin qutqaramyn dep ekeýi de sýǵa ketkenin jazǵan bolatynbyz.