BQO-da 898 balanyń ata-anasy ekpeden bas tartyp otyr
ORAL. QazAqparat - Batys Qazaqstan oblysynda balalardy ekpemen qamtý kórsetkishi 97 paıyz bolǵanymen, 898 balanyń ata-anasy ekpeden bas tartyp otyr. Bul týraly oblystyq densaýlyq saqtaý basqarmasynda «Balalar arasynda vaktsınatsııany uıymdastyrý, ekpeden bas tartý máseleleri» degen taqyrypta Aqtóbe qalasyndaǵy M.Ospanov atyndaǵy Batys Qazaqstan memlekettik medıtsına ýnıversıtetiniń professory, medıtsına ǵylymdarynyń doktory Gúlshat Qulnııazovanyń qatysýymen ótkizilgen dóńgelek ústel otyrysynda aıtyldy, dep habarlaıdy «QazAqparat» tilshisi.
Túrli mekeme-uıymdar ókilderimen qatar balalaryn ektirýden bas tartqan ata-analar qatysqan jıynda atalmysh máseleniń týyndaý sebepteri, túsindirý jumystaryn júrgizý joldary sóz boldy. Ata-analar kóbinese dinı nanym-senim negizinde bas tartady, sondaı-aq ekpe balanyń naýqastanýyna nemese densaýlyǵyna kinárat keltiredi dep oılaıdy. Ótken jyly 550-den astam ata-ana bas tartsa, bıyl olardyń qatary kóbeıip otyr.
Balalardy ektirmeýdiń sońy túrli jaǵdaılarǵa soqtyrýy múmkin. Mysaly, egilmegen balalardyń ishinen ekeýi juqpaly dertke shaldyqty, 2014 jyly eki jasar baldyrǵan týberkýlezben aýyrsa, 2016 jyly 8 jasar búldirshin kókjótelmen syrqattandy», dedi oblystyq densaýlyq saqtaý basqarmasynyń bólim basshysy Aınash Ǵubaıdýllına.
«Turǵyndar arasynda ekpe jumysynyń mańyzdylyǵyn uǵyndyrý maqsatynda josparly jumys júrgizý qajet. Ásirese, óz balalarynyń deni saý bolyp ósýi úshin asa qaýipti juqpaly aýrýlarǵa qarsy ektirýdiń mańyzy zor ekendigine ata-analardyń túsinik deńgeıin kóterip, kózin jetkizý qajet. Mundaı sharalar oblys aýdandarynda da uıymdastyrylady. Biz sol ata-analarmen kezdesip, olardyń da pikirlerin tyńdap, ózara senim negizinde jumys jasaıtyn bolamyz», dedi professor Gúlshat Qulnııazova.
