BQO-da 8500-den astam medıtsına qyzmetkerin koronavırýsqa qarsy egý kózdelýde
ORAL. QazAqparat – Batys Qazaqstan oblysynda koronavırýsqa qarsy 8500-den astam medıtsına qyzmetkerin egý kózdelýde, dep habarlaıdy QazAqparat tilshisi.
BQO Densaýlyq saqtaý basqarmasynyń baspasóz qyzmetinen málim etkenindeı, óńirge 651 myń doza ekpe ákelinedi dep josparlanyp otyr.
Ekpege daıyndyq sheńberinde qalalyq kópbeıindi aýrýhanada 1100 myń vaktsına sııatyn 15 tekshe metrlik tońazytqysh modýli ornatylady. Sondaı-aq Oraldaǵy 6 emhanada 12 myń vaktsına sııatyn 0,18 tekshe metrlik tońazytqysh kameralary qoıylady.
Qosymsha 30 qańtarǵa deıin vaktsınalar men 1400-deı hladoelementterdi tasymaldaý úshin termoındıkatory bar 30 termokonteıner jetkiziledi. Aýdandyq aýrýhanalar da termokonteınerlermen qamtamasyz etiledi.
Óńirde koronavırýsqa qarsy egýdi uıymdastyrý men ótkizý týraly BQO sanıtarlyq-epıdemıologııalyq baqylaý departamentimen birlesken buıryqqa qol qoıylǵan.
«Medservıs» JShS málimeti boıynsha 1 myń doza kólemindegi alǵashqy vaktsına toby birer kúnde keledi. Ony ázirge 1,2 tekshe metrlik tońazytqysh kamerasy bar oblystyq qan ortalyǵy qabyldap alyp, saqtaıdy. Mundaı kameralar aýdandyq aýrýhanalarda da bar.
Vaktsınalardy qabyldaý jáne berý máselesimen oblystyq JITS-pen kúres jáne onyń aldyn alý ortalyǵynyń mamandary aınalysady.
Vaktsınatsııa eki kezeńmen júrgiziledi, ıaǵnı ekinshi ekpe alǵashqysynan keıin 21-táýlikte jasalýy kerek.
Turǵyndar aýmaqtyq medıtsına uıymdarynyń egý pýnktterinde, al arnaıy kontıngentter tıisti vedomstvonyń mekenjaıynda egiledi.
Alǵashqy ekpe salatyn kúni kelýshini mindetti túrde dáriger qarap, qyzýyn ólshep, epıdemıologııalyq taldaý alady. Qyzýy nemese syrqaty bolsa, ekpege jiberilmeıdi.
Koronavırýsty juqtyrý qaýpi joǵary toptar aldymen egiledi. Olar – medıtsına qyzmetkerleri, sanıtarlyq-epıdemıologııalyq qyzmet mamandary, pedagogtar, polıtseıler, stýdentter, medıtsınalyq-áleýmettik jáne jabyq balalar mekemeleri, TJ, bilim salasy, UQK, memlekettik kúzet qyzmetkerleri, memlekettik qyzmetshiler, elde akkredıttelgen dıplomatııalyq, konsýldyq mekemeler qyzmetkerleri (Qazaqstan azamattary), sozylmaly syrqatqa shaldyqqan adamdar.
«Egý jumystaryn qalalyq, sonyń ishinde jeke emhanalarda jáne aýdandyq aýrýhanalarda 26 kabınette arnaıy daıyndalǵan qyzmetkerler júrgizedi. Egý kabınetteri barlyq qural-jabdyqtarmen qamtamasyz etilgen», dep habarlady oblystyq densaýlyq saqtaý basqarmasynyń baspasóz qyzmeti.
Eske sala keteıik, budan buryn Batys Qazaqstanda bir aıda 100-ge jýyq balanyń koronavırýs juqtyrǵanyn jazǵan bolatynbyz.
