BQO-da 84,5 tonna zalaldanǵan ónim Qazaqstanǵa kirgizilmedi
ORAL. KAZINFORM – Batys Qazaqstan oblysynda qaýipti karantındik nysan – jataǵan kekire tuqymdarymen zalaldanǵan 84,5 tonna ónimdi Qazaqstan aýmaǵyna kirgizýge jol berilmedi.
Aýyl sharýashylyǵy mınıstrliginiń málimetinshe, zańbuzýshylyq «Tasqala» jáne «Shaǵan» fıtosanıtarııalyq baqylaý beketterinde júrgizilgen baqylaý barysynda anyqtalǵan.
Inspektorlar «Tasqala» fıtosanıtarııalyq baqylaý beketinde azyq-túlikke arnalǵan maqsary jáne arpa tuqymdaryn tekserip, ónimnen fıtosanıtarııalyq saraptama jasaý úshin synamalar aldy.
Al «Shaǵan» fıtosanıtarııalyq baqylaý beketinde azyq-túlikke arnalǵan zyǵyr tuqymdarynan alynǵan synamalar zerthanalyq zertteýge joldandy.
«Fıtosanıtarııa» mekemesiniń Batys Qazaqstan oblystyq karantındik zerthanasy fılıalynyń zertteý qorytyndysyna sáıkes, tekserilgen barlyq synamalardan karantındik nysanǵa jatatyn jataǵan kekireniń (Acroptilon repens L.) tuqymdary anyqtaldy.
– Elimizdiń qoldanystaǵy zańnamasyna sáıkes, zalaldanǵan ónimdi el aýmaǵyna kirgizýge ruqsat berilmedi. Atalǵan júk tolyǵymen eksporttaýshy elge keri qaıtaryldy. Aýyl sharýashylyǵy mınıstrligi fıtosanıtarııalyq qaýipsizdikti qamtamasyz etý, sondaı-aq aýyl sharýashylyǵy óndirisine qaýip tóndiretin karantındik ónimderge jol bermeý baǵytyndaǵy jumystardy jalǵastyrýda, – delingen habarlamada.
Aıta keteıik, bıyl Qazaqstanda karantındik fıtosanıtarııalyq baqylaý barysynda 1 377 zańbuzýshylyq anyqtalǵan. Onyń 1 213-i Reseıden, 153-i Qyrǵyzstannan ónim tasymaldaý kezinde tirkelgen. Zańbuzýshylyqtardyń arasynda karantındik nysandardyń anyqtalýy, fıtosanıtarııalyq qujattardyń jáne qajetti tańbalaýdyń bolmaýy bar.
