BQO-da 800 mln-ǵa jýyq teńgege órtke qarsy tehnıka satyp alynbaq

ORAL. KAZINFORM – Batys Qazaqstan oblysynda memlekettik orman qory jeriniń jalpy aýmaǵy 224 699 gektar bolsa, sonyń 88 457 gektary toǵaımen kómkerilgen.

BQO tabıǵı resýrstar jáne tabıǵat paıdalanýdy retteý basqarmasy basshysynyń orynbasary Darhan Zakarınniń óńirlik kommýnıkatsııalar qyzmeti alańynda ótken brıfıngide málim etkenindeı, óńirde 8 orman mekemesiniń qaramaǵynda 111 adam jumys isteıtin ortalyqtandyrylǵan órt stantsııalary bar. 

Darhan Ámirhanulynyń sózine qaraǵanda, 2019-2024 jyldar aralyǵynda memlekettik orman qorynda jalpy aýdany 10 616,3 ga bolatyn 72 órt tirkeldi. Sonyń ishinde 5 623,3 gektary – orman ósirilgen aýmaq.

Bıyl Oral qalasy aýmaǵynda 4,5 gektardy qamtyǵan 1 orman órti boldy.

- Qazirgi tańda orman sharýashylyǵy mekemelerinde 12 órt sóndirý kóligi, tirkemeli soqamen jabdyqtalǵan ár túrli markaly 31 traktor, 22 sý taratqysh jáne 25 patrýldik kólik, 312 aspaly sý sepkish, 8 dron bar. Sonymen qatar mekemeler normatıvke sáıkes tolyqtaı 430 radıobaılanys quraldarymen jabdyqtalǵan. 2024 jyly orman mekemelerin materıaldyq-tehnıkalyq jaraqtandyrý úshin oblys bıýdjetinen 769,8 mln teńge jumsaldy. Osy qarjyǵa 33 traktor, 1 patrýldik mashına jáne «KamAZ» bazasyndaǵy 2 órt sóndirý mashınasy jáne 27 mototsıkl alyndy, - deıdi D.Zakarın.

Onyń aıtýynsha, bıyl bul maqsatqa oblystyq bıýdjetten 792 mln teńge bólinip, «KamAZ» bazasyndaǵy 6 órt sóndirý mashınasyn satyp alý jáne 4 órt baqylaý munarasyn ornatý kózdelýde. Qazirgi tańda memlekettik satyp alý konkýrstary júrgizilýde. 

- Sondaı-aq 2025 jyly jergilikti bıýdjetten qosymsha 44,1 mln teńge qarastyrylyp, osy qarajatqa 47 ár túrli arnaıy qural-jabdyq (soqa, kýltıvator, ratsııalar jáne basqa) alynýda.

Orman sharýashylyǵy mekemelerinde 7 órt baqylaý munarasy jáne sonsha beınebaqylaý kameralary radıýsy 8 km aýmaqty baqylap, órtti jedel anyqtaýǵa jáne ony sóndirýge ýaqytyly kirisýge múmkindik beredi. Oǵan qosa 10 orman órtin erte anyqtaý júıesi de bar. Taǵy 8 mekeme ushqyshsyz ushatyn apparattarmen jabdyqtalǵan, - deıdi basqarma basshysynyń orynbasary.

Basqarma málimetine qaraǵanda, jyl basynan beri oblystyń memlekettik orman qory aýmaǵynda 608 reıd júrgizilip, tabıǵat qorǵaý zańnamasyn buzǵany úshin 31 hattama toltyryldy. 147,4 myń teńge kóleminde aıyppul salyndy. Órt qaýipsizdigin buzǵan 1 derek (19,6 myń teńge) tirkeldi.

Eske sala keteıik, budan buryn Oral qalasy mańynda orman alqaby órtengenin jazǵan edik.