BQO-da 800-den astam adam qar qursaýynan qutqaryldy
ORAL. QazAqparat - Batys Qazaqstan oblysynda sońǵy kúnderi qar qursaýynan 200-den astam adam qutqaryldy, dep habarlaıdy QazAqparat tilshisi.
BQO TJ departamentiniń baspasóz qyzmetinen habarlaǵandaı, 111 tehnıka tazartylǵan jerge shyǵaryldy. 218 adam qutqarylsa, sonyń 16-sy - balalar.
Báıterek aýdanynda 18 aqpan kúngi saǵat 21.00-den keshegi 12.00-ge deıin boran men qarǵa baılanysty jergilikti joldarda turyp qalǵan 12 jeńil avtokólikke (20 adam) kómek kórsetildi. Sol sekildi keshe saǵat 11.19-da Aqjaıyq aýdanynda Oral-Atyraý jolynyń 175-shaqyrymynda synyp qalǵan «GAZel» avtokóliginiń júrgizýshisi Chapaev aýylyna jetkizildi. Búgin túngi saǵat 00.30-da Báıterek aýdanynda Oral-Saratov jolynyń 45-shaqyrymynda bir júk jáne 4 jeńil kólik (17 adam, úsheýi - balalar) tazartylǵan jerge shyǵaryldy.
Saǵat 01.05-te Tasqala aýdanynda Oral-Saratov jolynyń 96-104 km aralyǵynda jolaýshylar avtobýsy, júk tıeıtin 5 «GAZel» jáne 57 jeńil kólikke járdem berildi. Bul kólikterde 181 adam (16-sy - balalar) bolǵan, sonyń ishinde 38-i - Ózbekstan azamattary. Ózbekstandyq azamattardyń avtobýstyń ishin jylytý úshin gaz ballony men elektr qyzdyrǵyshyn alyp kele jatqany belgili boldy. Bul kólik ishinde órt tutanýyna sebep bolýy múmkin edi. Abyroı bolǵanda, azamattyq qorǵaý organynyń qyzmetkerleri onyń aldyn aldy. Aqtóbe oblysynda qaıǵyly oqıǵa bolyp, 52 adamnyń avtobýs ishinde janyp ketkeni belgili.
Bıyl óńirde borandy ári qarly qys bolyp tur. Jyl basynan beri 809 adam qutqarylyp, 182 adam evakýatsııalandy. 380 tehnıka tazartylǵan jerge shyǵaryldy.
Eske sala keteıik, óńirde boranǵa baılanysty joldar jabylǵan. Alpystan astam avtokólik qar qursaýynan shyǵaryldy.
