BQO-da 80-nen astam adam qar qursaýynan shyǵaryldy

  ORAL. QazAqparat - Kesheden beri apattyq-qutqarý jumystary barysynda Aqjaıyq aýdanynda 14 avtokólik pen 60 adam qar qursaýynan shyǵaryldy,  dep habarlaıdy «QazAqparat» HAA tilshisi.

BQO TJ departamentinen túsken málimetke qaraǵanda, sonyń úsheýi - balalar, bireýi - aıaǵy aýyr áıel. Mysaly, TJ departamentiniń aýa raıy buzylatyny jóninde aldyn ala eskertý jarııalaǵanyna qaramastan, 5 aqpan kúni jolǵa shyqqan 12 avtokólik Esensaı aýyly mańynda, Oral-Atyraý joly boıynda qar qursaýynda qaldy. Aq tútek boranda zardap shekkenderge jetý ońaı bolǵan joq. Qutqarýshylarǵa aýdandyq turǵyn úı-kommýnaldyq sharýalyǵy bóliminiń eki traktory kómektesip, joldaǵy úıilgen qardy arshydy.  Sol sekildi Shyńǵyrlaý aýdany Lýben aýyly mańynda 6 jolaýshysy bar jeńil kólik te qar qursaýynda qalǵan. Jedel qutqarý jasaǵynyń tórt qutqarýshysy «KamAZ» avtokóligimen baryp, olardy Shyńǵyrlaý aýylyna jetkizdi. Sondaı-aq Terekti aýdanynda 2 avtokólik pen 16 adam, Qaratóbede eki adam qaýipsiz jerlerge jetkizildi.

 

Eske sala keteıik, keshe boran soǵýyna baılanysty saǵat 18.00-den bastap barlyq baǵyttaǵy joldar jabylyp, 21.00-de qaıta ashylǵan bolatyn. Búgin saǵat 02.00-den Samara-Shymkent kúre jolynyń 330-526 shaqyrymy (Jympıty aýylynan Aqtóbe oblysyna deıin) aralyǵy jabyq.