BQO-da 8 jylqyny poıyz basyp ketti
NUR-SULTAN. QazAqparat – Batys Qazaqstan oblysynda 8 jylqyny poıyz basyp ketti, dep habarlaıdy QazAqparat Kóliktegi polıtsııa departamentiniń baspasóz qyzmetine silteme jasap.
«Bıylǵy jylǵy 11 qarashada saǵat 22:35-te Oral stantsııasyndaǵy Jelilik polıtsııa bólimine «Pepel» razezinde júk poıyzynyń mashınısi temirjol ústinde jaıylyp júrgen úı janýarlaryn baıqap, shuǵyl tejegishti qoldanǵany týraly habarlama kelip tústi. Soǵan qaramastan poıyz 8 jylqyny qaǵyp óltirdi»,- dedi Kóliktegi polıtsııa departamenti Ákimshilik polıtsııa basqarmasynyń bastyǵy Jasulan Baıkenov.
Onyń sózinshe, atalǵan fakti boıynsha oqıǵa ornyna Oral stantsııasynyń jelilik polıtsııa basqarmasynyń jedel-tergeý toby shyqty. Ótkizilgen is-sharalar nátıjesinde úı janýarlarynyń ıesi Batys Qazaqstan oblysynyń turǵyny ekeni anyqtaldy. 43 jastaǵy áıelge QR ÁQBtK-niń 559-babynyń 1-bóligi, ıaǵnı temirjol boıynda mal jaıý qaǵıdalaryn buzý faktisi boıynsha 5 aılyq eseptik kórsetkish mólsherinde ákimshilik aıyppul salyndy.
«Bıylǵy jyldyń basynan beri temirjol boıynda mal júrýine baılanysty poıyzdardy shuǵyl tejeýdiń 1628 faktisi tirkeldi. Temir joldardyń bólingen jolaǵynda mal jaıǵany úshin jalpy 1124 quqyqbuzýshy ákimshilik jaýapqa tartyldy», - dep tolyqtyrdy sózin Baıkenov.
«Kólik polıtsııasy úı janýarlarynyń temirjolǵa shyǵýy poıyzdardyń qozǵalysyna qaýip tóndiretinin taǵy da eske salady. Shuǵyl tejeý jolaýshylardyń densaýlyǵy men ómirine, sondaı-aq tasymaldanatyn júkterge zalal keltirýi múmkin. Janýarlarmen soqtyǵysqan kezde lokomotıv zaqymdanady, jol shyǵynǵa ushyraıdy. Poıyzdardyń qozǵalys kestesinde buzýshylyqtar paıda bolýyna ákep soǵady»,-delingen habarlamada.
