BQO-da 8 jastaǵy balany uryp óltirgen týysqany quryqtaldy- ІІM
ASTANA. 14 naýryz. QazAqparat - BQO-da 8 jastaǵy balany uryp óltirdi degen kúdikpen týysqany quryqtaldy.
Bul týraly búgin jýrnalıstermen bolǵan brıfıngte Іshki ister mınıstrliginiń resmı ókili Nurdildá Oraz málim etti.
«Batys Qazaqstandyq polıtseıler 8 jastaǵy er balany óltirý qylmysyn ashty. Onyń zorlyq-zombylyq belgileri bar máıiti Zashaǵan kentindegi (Oral qalasynyń aýmaǵy) óz úıinde tabylǵan bolatyn. Sol kúni qylmysty jasaǵan degen kúdikpen balanyń 28 jastaǵy nemere aǵasy quryqtalyp, ýaqytsha ustaý abaqtysyna qamaldy»,-dedi resmı ókil.
Kúdiktiniń jábirlenýshiniń otbasymen bir úıde turyp jatqany jáne sol kúni balanyń ata-anasy 8 naýryz merekesin toılaýǵa qonaqqa ketip, balany nemere aǵasymen birge qaldyryp ketkeni anyqtaldy.
«Araqqa toıyp alǵan kúdikti 8 jastaǵy nemere inisin uryp-soǵyp, qylǵyndyryp óltirgen. Qonaqtan kelgen ata-ana balasynyń óli denesi kórip, medıtsınalyq jedel járdem men polıtsııany shaqyrǵan»,-dedi N. Oraz.
Іs boıynsha birqatar sot-medıtsınalyq saraptamalar taǵaıyndaldy. Adam óltirý faktisi boıynsha qylmystyq is qozǵalyp, tergeý amaldary júrgizilýde.
