BQO-da 8 adam qaza tapqan jol apatynan aman qalǵandardyń jaǵdaıy qalaı

ORAL. KAZINFORM — Batys Qazaqstan oblysynda jantúrshigerlik jol apaty saldarynan jaraqat alǵan tórt adamnyń jaǵdaıy belgili boldy.

BQO densaýlyq saqtaý basqarmasynan túsken málimetke qaraǵanda, barlyq patsıent dárigerlerdiń turaqty baqylaýynda. Em-sharalar tolyq kólemde júrgizilip jatyr.

On úsh jastaǵy ul bala Aqjaıyq aýdandyq aýrýhanasynan oblystyq kópbeıindi balalar aýrýhanasyna 17 qarasha kúni saǵat 21.40-ta jetkizildi. Jabyq bas-mı-jaraqatyna qosa onyń mıy shaıqalǵan. Tóbe tusyndaǵy jumsaq tinderiniń jaraqaty bar.

Sol mezgilde oblystyq kópbeıindi aýrýhanaǵa jetkizilgen 1 jasar qyzdyń da jabyq bas-mı jaraqatymen birge mıy shaıqalǵan. Sol jaq san súıeginiń kishi budyry synǵan.

Bulardyń ekeýiniń de jaǵdaıy ortasha aýyr.

23 jastaǵy áıelge alǵashqy medıtsınalyq kómek kórsetilgennen keıin Aqjaıyq aýdandyq aýrýhanasynda ota jasalyp, talaǵy alyp tastalǵan. Jabyq bas-mı jaraqatyna qosa mıy shaıqalǵan. Sondaı-aq qursaq qýysynda, sol jaq shyntaǵynyń býynynda jáne oń jaq sanynda jaraqat bar. Jaǵdaıy turaqty.

- 24 jastaǵy er adam beliniń tómengi bóliginen, sol jaq jambas-san býynynan jaraqat alǵan. Naýqasqa ambýlatorlyq em taǵaıyndalyp, balasynyń qasynda bolý úshin oblystyq kópbeıindi balalar aýrýhanasyna jiberildi. Jaǵdaıy qanaǵattanarlyq, - dep habarlady vedomstvodan.

Eske sala keteıik, budan buryn Batys Qazaqstanda jol apatynan 8 adamnyń kóz jumǵanyn jazǵan edik.

Sondaı-aq BQO-da 8 adam qaza tapqan jol apatyna baılanysty komıssııa quryldy.