BQO-da 8 adam qaza tapqan jol apatyna baılanysty komıssııa quryldy
ORAL. KAZINFORM — Batys Qazaqstan oblysynyń ákimi Narıman Tóreǵalıevtiń tóraǵalyǵymen Chapaev-Jańaqala-Saıqyn baǵytyndaǵy tas jolda bolǵan jol-kólik oqıǵasynyń mán-jaıyn anyqtaý jáne zardap shekkenderge kómek kórsetýdi uıymdastyrý jónindegi komıssııa quryldy.
BQO ákiminiń baspasóz qyzmetinen málim etkenindeı, QR Úkimetiniń tapsyrmasyna sáıkes qurylǵan jumys toby Jańaqala aýdanynda oryn alǵan jol apatynyń mán-jaıyn tolyq ári obektıvti anyqtaýdy, sondaı-aq zardap shekkenderge qajetti kómek kórsetýdi, oqıǵanyń sebepteri men mán-jaıyna taldaý júrgizip, quzyretti organdarmen ózara is-qımyldy qamtamasyz etedi.
Komıssııa quramyna oblys prokýrory, oblystyq polıtsııa departamenti, tótenshe jaǵdaılar departamenti jáne salalyq basqarmalar basshylary, Jańaqala aýdanynyń ákimi engizildi.
- Bul - búkil óńirimiz úshin óte ókinishti jaǵdaı. Aýyr qaza qanshama otbasyna orny tolmas qaıǵy ákeldi. Zardap shekkenderge tıisti medıtsınalyq járdem beriledi, al qaza tapqandardyń otbasylaryna zań aıasynda kómek kórsetiletin bolady, - dedi oblys ákimi.
Óńir basshysy Jańaqala aýdanynyń ákimine qaza tapqan jandardyń jerleý rásimin uıymdastyrýdy, sondaı-aq zardap shekkender men qaza tapqandardyń otbasylaryna barlyq qajetti medıtsınalyq jáne psıhologııalyq kómek kórsetýdi tapsyrdy.
Atalmysh jol apaty saldarynan qaza tapqan azamattar – Jańaqala aýdany Muqyr, Jańaqala, Qyzyloba, Másteksaı jáne Qaratóbe aýdany Egindikól aýylynyń turǵyndary.
Eske sala keteıik, budan buryn Batys Qazaqstanda jol apatynan 8 adamnyń kóz jumǵanyn jazǵan edik.