BQO-da 8,5 mlrd teńgege úsh birdeı óndiris orny iske qosylmaqshy
ORAL. QazAqparat - Batys Qazaqstan oblysynda aýyl sharýashylyǵy ónimderin qaıta óńdeý salasynda 8,5 mlrd teńgeniń ınvestıtsııalyq jobalary júzege asyrylýda, dep habarlaıdy «QazAqparat» tilshisi.
Oblys ákimi Altaı Kólginovtiń aıtýynsha, Zelenov aýdany Şapov aýylynda «Jaıyq Agro LTD» JShS quny 3,5 mlrd teńgeni quraıtyn, jylyna 6,2 myń tonna qus etin óndiretin keshenniń negizgi qurylys jumystaryn aıaqtap, bıylǵy qarasha aıynda iske qosty. Keshen tolyq qýatymen jumys jasaǵan kezde oblys turǵyndarynyń qus etine degen qajettiligin qamtamasyz etip, 109 jańa jumys orny ashylmaqshy.
Taǵy bir tyń óndiris orny Oral qalasynda salynýda. «POSh Rýno» JShS jobalyq quny 2,2 mlrd teńge, jylyna 182 myń dana iri qara jáne 624 myń dana usaq maldyń terisin óńdeıtin kásiporyn qurylysy men jabdyqtardy qondyrý jumysyn aldaǵy jeltoqsan aıynda aıaqtamaqshy. Munda 50 jańa jumys orny ashylmaqshy.
Sol sekildi Oral qalasynda «Jelaev astyq ónimderi kombınaty» quny 1,8 mlrd teńgege baǵalanǵan, saǵatyna 2 tonna makaron ónimderin shyǵaratyn fabrıkanyń negizgi qurylys jumystaryn bitirdi. Munda qazir ıtalııalyq «PAVAN» fırmasynan satyp alynǵan jabdyqtardy montajdaý jumystary júrgizilýde. Bul fabrıkany da (50 jańa jumys orny) aldaǵy jeltoqsan aıynda iske qosý kózdelýde.
