BQO-da 757 mln teńgeden astam qarjyǵa 154 medıtsınalyq qurylǵy satyp alynady
ORAL. QazAqparat – Batys Qazaqstan oblysynda 757,183 mln teńgege 154 dana medıtsınalyq qurylǵy satyp alý kózdelip otyr, dep habarlaıdy QazAqparat tilshisi.
Oblystyq densaýlyq saqtaý basqarmasynyń basshysy Bolatbek Qaıýpovtyń aıtýynsha, aldaǵy kúzde koronavırýs indetiniń ekinshi tolqyny kelý múmkindigi boljanyp otyrǵandyqtan, óńirde soǵan aldyn ala qam jasalýda.
Atalǵan medıtsınalyq qurylǵylarǵa qosa 37 sanıtarlyq avtokólik alý, 200 oryndyq modýldi juqpaly aýrýlar aýrýhanasyn salý josparlanýda.
Respýblıkalyq bıýdjetten jeke qorǵanys quraldaryn alýǵa 287,7 mln astam qarajat bólindi. Al jergilikti qazyna esebinen medıtsınalyq qural-jabdyq alýǵa 170 mln jýyq teńge qaraldy.
Qazirgi kezde koronavırýsqa shaldyqqandardy emdeý úshin 3445 tósek-oryn bolsa, sonyń 1823-i karantındik, 752-si provızorlyq statsıonarda, 870-i juqpaly aýrýlar aýrýhanasynda. Kúni búgin bulardyń sany 891 tósek-orynǵa deıin qysqardy.
B.Qaıýpovtyń sózine qaraǵanda, statsıonarlarda 159 medıtsına qyzmetkeri jumys isteýde. Jalpy, oblysta 1687 dáriger, 6388 orta býyn qyzmetkeri bar. Bıyl 64 dáriger óńirge keldi. Sondaı-aq Batys Qazaqstan joǵary medıtsına kolledjin bitirgen 104 maman iske kiristi.
Ókinishke qaraı, 1201 medıtsına qyzmetkeri indetke shaldyqty. Koronavırýsqa qarsy sharalarǵa tartylǵan qyzmetkerlerge ótemaqy tóleý úshin qurylǵan arnaıy komıssııa 159 ótinishti qarasa, sonyń 101-i qanaǵattandyryldy. 13 materıalǵa qatysty Densaýlyq saqtaý mınıstrligimen kelisilýde. Ótemaqy tóleý úshin materıal jınaý jalǵasýda.
«Kúzde JRVJ jáne tumaý órshıtindikten, jergilikti bıýdjetten 67 myń dana ekpe satyp alynýda. Qosymsha 83 myń dana ekpege ótinim berildi. Maýsymdyq aýrýǵa kovıd qosylsa, jaǵdaı kúrdelenip ketýi yqtımal. Sondyqtan qosymsha 590 tósek-oryn ázirlendi. Árbir medıtsına mekemesinde eki aıǵa jetetin dári-dármek qory bar. 123 mobıldi brıgada jumysqa daıyn. Oblysta qazir 130 IVL apparaty, 451 ottegi kontsentratory, 172 Bobrov apparaty, 10 tomograf, 47 rentgen apparaty bar. Qajetti medıtsınalyq jabdyq alý budan bylaı da jalǵasady. Óńirde kún saıyn onshaqty adamnyń kovıdpen aýyrǵany tirkelip otyrǵandyqtan, bosańsýǵa bolmaıdy», dedi Bolatbek Amangeldiuly.
Eske sala keteıik, budan buryn BQO-da toı, merekeler týraly habarlaǵandar syıaqy alatynyn jazǵan edik.
