BQO-da 75 mln teńge para alǵan salyq qyzmetkeri sottaldy

ORAL. KAZINFORM – Batys Qazaqstan oblystyq qylmystyq ister jónindegi mamandandyrylǵan aýdanaralyq sotynda BQO boıynsha memlekettik kirister departamentiniń jetekshi mamany Aıan Borashevqa qatysty QR QK 366-baby 4-bóligine (asa iri kólemde para alý) sáıkes úkim shyqty.

Sotta málim bolǵanyndaı, A.Borashev memlekettik qyzmetshi bola tura, 2021 jyldyń jeltoqsanynan 2022 jyldyń 22 qyrkúıegine deıin kásipkerden 75 mln teńge para alǵan.

Esesine ol aýyr salmaqty júk kólikterin «Syrym» beketinen kedergisiz jáne jedel ótkizýge kómektesken.

BQO qylmystyq ister jónindegi mamandandyrylǵan aýdanaralyq sotynan alynǵan málimetke qaraǵanda, memlekettik aıyptaýshy taǵylǵan aıypty qoldap, sottalýshyny 12 jylǵa bas bostandyǵynan aıyrýdy surady.

Sottalýshy óz kinásin moıyndaǵan joq.

Sot úkimimen A.Borashev QR QK 366-baby 4-bóligine sáıkes aıypty dep tanylyp, ol 10 jyl merzimge bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy.

Sot úkimi zańdy kúshine engen joq.

Eske sala keteıik, budan buryn BQO turǵyny tisin sapasyz emdegen klınıkadan 12 mln teńge óndirip alǵanyn jazǵan bolatynbyz.