BQO-da 73,7 mlrd teńgege jol jóndeý júrgiziledi

ORAL. QazAqparat – Batys Qazaqstan oblysynda bıyl «Qýatty óńirler – el damýynyń draıveri» ulttyq jobasy, sondaı-aq «Aýyl – el besigi» baǵdarlamasy aıasynda 73,7 mlrd teńgege barlyq mańyzdaǵy 570 shaqyrymnan astam joldy jóndeý kózdelýde. Bul týraly oblys ákimi Narıman Tóreǵalıevtiń tóraǵalyǵymen ótken apparat keńesinde aıtyldy, dep habarlaıdy QazAqparat tilshisi.

BQO Jolaýshylar kóligi jáne avtomobıl joldary basqarmasynyń basshysy Aıdar Meńeev málim etkenindeı, sonyń ishinde 26,6 mlrd teńge oblystyq jáne aýdandyq mańyzy bar avtojoldardyń 55 jobasy boıynsha 332 shaqyrymdy jóndeýge bólingen.

Onyń sózine qaraǵanda, oblystyq mańyzy bar Barbastaý – Aqjaıyq – Inder (43-93 km), Bórli – Aqsaı – Jympıty (68-139 km), Chapaev – Jańaqala – Saıqyn (130-191 km) avtojoldaryn qaıta jańartý jalǵasady. Buǵan respýblıkalyq bıýdjetten 4 871 mln teńge qarastyrylǵan. Al Terekti – Aqsaı (58-73 km) jáne Tasqala – Aqqýraı – Bolashaq (111-149 km) avtojoldary ýchaskelerin ortasha jóndeý aıaqtalady. Oǵan qosa Oral qalasy áýejaıynyń kirme joly men Báıterek aýdanyndaǵy Derkól ózenindegi apatty jaǵdaıdaǵy kópir ortasha jóndeýden ótedi.

Sonymen qatar Barbastaý – Aqjaıyq – Inder (93-145 km), Chapaev – Jańaqala – Saıqyn (257-337 km), RF shekarasy – Jalpaqtal – Juldyz – Qarasý (50-90 km) avtojoly jobalaryna jobalaý-smetalyq qujattama ázirlenip jatyr.

Óńirde aýdandyq mańyzy bar jáne eldi mekenderge kirme joldardyń 270 shaqyrymy retteledi.

Barlyq jol jobalaryn júzege asyrý úshin qajetti jol qurylysy materıaldarymen ýaqtyly qamtý asa mańyzdy.

Aıdar Meńeevtiń aıtýynsha, jergilikti jerde qıyrshyq tastyń bolmaýyna baılanysty qajetti ınertti materıaldar Aqtóbe oblysynan temir jol arqyly jetkiziledi. Bıylǵy qajettilik – 1931 myń tonnadan astam qıyrshyq tasty tasymaldaý úshin 28 myń vagon kerek.

«Óńirde sońǵy jyldary avtojol nysandarynda oryn alǵan ınertti materıaldar tapshylyǵy máselesi birtindep sheshilýde. Osy rette «Qazaqstan temir joly» AQ, «Qazaqstan temir joly – Júk tasymaly» AQ jáne «QazTemirTrans» AQ-men júrgizilgen kelissózder nátıjesinde qıyrshyq tasty Aqtóbe oblysynan jetkizý jumystary rettelýde. Kúni búgin oblys osy materıalman 38 paıyzǵa ǵana (390 myń tonna nemese 5665 vagon) qamtamasyz etilip otyr. Barlyǵy 10 temir jol quramy jumyldyrylǵan. Sol sekildi ótken jyly oblysta bıtým jetispeýshiligi bolǵany málim. Qazirgi tańda jergilikti avtojoldar jelisiniń jobalary úshin 8 myń tonnaǵa jýyq (qajettilik – 30 myń tonna) bıtým daıyndaldy. Osy baǵyttaǵy jumystar jalǵasýda», - dedi A.Meńeev.

Óńir basshysy Narıman Tóreǵalıev Memleket basshysynyń tapsyrmasyna sáıkes aýyldardyń turmys sapasyn jaqsartý úshin ekonomıkanyń kúretamyry sanalatyn jol qurylysyn sapaly da ýaqtyly júrgizýdiń mańyzdylyǵyn atap kórsetti.

Apparat keńesinde sondaı-aq aýyldardy tsıfrlandyrý máselesi de talqyǵa salynyp, tıisti tapsyrmalar berildi.