BQO-da 700-ge jýyq alaıaqtyq deregi tirkeldi
ORAL. QazAqparat - Batys Qazaqstan oblysynda bıylǵy toǵyz aıda 692 alaıaqtyq deregi tirkelip, sonyń 562-si anyqtaldy, dep habarlaıdy «QazAqparat» tilshisi.
BQO ІІD baspasóz qyzmetkeri Asylaı Ǵubashevanyń aıtýynsha, qylmystyń ashylýy 81,2 paıyzdy qurap otyr.
Qazirgi tańda adamdardy aldaýdyń taǵy bir tásili belgili bolyp otyr. Ol - jalǵa beriletin úılerdi alýǵa «kómek kórsetý» nemese zańsyz jer telimderin satý. Jýyrda belgisiz bireý qala ákimdigi janynda 1964 jylǵy azamatty aldap «jalǵa beriletin turǵyn úı alýǵa kómektesemin» dep, bastapqy jarnasyn surap, 4 mln teńgesin ıemdenip ketken. Abaı polıtsııa bólimi júrgizgen jedel izdestirý sharalary barysynda osy qylmysqa kúdikti retinde 1974 jylǵy G. esimdi azamatsha anyqtalyp, ustaldy. Kúni búgin tergeý amaldary jalǵasýda. Sol sekildi keıbireýler alaıaqtardyń «Jumysqa ornalastyramyn» degen sózine senip qalýda. Mysaly, buryn da isti bolǵan 1984 jylǵy turǵyn 1991 jylǵy jigittiń senimine kirip, oǵan jumys taýyp bermekshi bolyp, 110 myń teńgesin jymqyrǵan. Tergeý barysynda alaıaqtyń budan basqa bes adamdy otyrǵyzyp ketkeni belgili boldy. Oǵan qatysty QR QK 190-baby 2-bólimine qatysty qylmystyq is qozǵalyp, tergeý amaldary júrgizilýde.
