BQO-da 700-den astam polıtsııa qyzmetkeri marapattaldy
ORAL. QazAqparat - Búgin Oralda Qazaqstan polıtsııasy men Memlekettik qyzmetshi kúnine oraı saltanatty shara ótti, dep habarlaıdy QazAqparat tilshisi.
Abaı alańyna jınalǵan tártip saqshylaryn oblys ákimi Altaı Kólginov quttyqtap, polıtsııa qyzmetkerleriniń qoǵamdyq tártipti saqtaý men el tynyshtyǵyn kúzetýdegi eńbegi mol ekendigin atap kórsetti.
Minsiz qyzmetimen kózge túsken saqshylarǵa oblys ákiminiń alǵyshattary tapsyryldy.
QR Іshki ister mınıstri, polıtsııa general-polkovnıgi Qalmuhambet Qasymovtyń quttyqtaý haty men buıryǵy oqylǵannan keıin sala úzdikterine marapattar men jańa shenderi tabys etildi.
BQO ishki ister departamentiniń bastyǵy, polıtsııa general-maıory Maqsuthan Áblázimovtiń buıryǵymen barlyǵy 744 qyzmetker marapattaldy. Sonymen qatar sala ardagerleri men jas saqshylar da umyt qalǵan joq.
Qazaqstan polıtsııasy kúninde minsiz qyzmeti úshin saqshylarǵa qurmet kórsetýmen birge beıbit kezde óz mindetterin atqarý kezinde kóz jumǵandar eske alynady. Elimiz táýelsizdik alǵannan bergi merzimde oblysta 32 polıtsııa qyzmetkeri qaza tapty. Búgin departament basshylary olardyń árqaısysynyń úıinde bolyp, gúl, syılyqtar tartý etip, qarjylaı qoldaý kórsetti.
Sonymen qatar osy kezeńde bandylardy joıý men asa qaýipti qylmyskerlerdi quryqtaý kezinde Elbasy Jarlyǵymen Batys Qazaqstannan 75 polıtsııa qyzmetkeriniń joǵary memlekettik nagradalarmen marapattalǵanyn aıta keteıik.
