BQO-da 68 ınvestıtsııalyq jobany qarjylandyrý qıyndyǵy týyndap otyr

ORAL. KAZINFORM – Batys Qazaqstan oblysynda ótken jyly quny 85,4 mlrd teńge 68 ınvestıtsııalyq joba júzege asyryla bastady. 

BQO qarjy basqarmasynyń basshysy Nurlan Esenǵalıevtiń málim etkenindeı, bıyl osy jobalardy qarjylandyrý qıyndyǵy týyndap otyr.

Nurlan Muhıtulynyń aıtýynsha, respýblıkalyq jáne jergilikti bıýdjetteriniń múmkindikterine qaraı qarajat kózderi izdestiriledi. 

– Bıýdjettiń shyǵys bóligin josparlaý kezinde onyń áleýmettik baǵyty saqtaldy. Jalpy sıpattaǵy transfertterdiń shekteýli jetkizilýin jáne ınflıatsııalyq protsesterdiń ósýin eskere otyryp, shyǵystar bıýdjettik sholý negizinde qalyptastyryldy. Osyǵan oraı jalpy sıpattaǵy transfertterdiń qysqarýyna baılanysty 2025 jyly júzege asyrylǵan qurylys, qaıta jańǵyrtý jáne kúrdeli, aǵymdaǵy jóndeý shyǵyndary, sondaı-aq materıaldyq-tehnıkalyq bazany nyǵaıtý sııaqty shyǵyndar bıyl kózdelmegen, - dedi N.Esenǵalıev. 

Onyń sózine qaraǵanda, 2026 jylǵy oblys bıýdjeti 519,2 mlrd teńge (2027 jyly – 635,4, 2028 jyly – 674,9 mlrd teńge) kóleminde bekitilse, sonyń 440,2 mlrd teńgesi – aǵymdaǵy shyǵystar, 79 mlrd teńgesi – damý shyǵystary. 

Qarjy kózderiniń shekteýli ekenine qaramastan, áleýmettik salaǵa bıyl 281,6 mlrd teńge nemese jalpy bıýdjettiń 54,2 paıyzyn jumsaý josparlanyp otyr. 

– Úsh jyldyń bıýdjet parametrleri barynsha ońtaılandyrylyp, qarajat soǵan qaraı qarastyryldy. Bıylǵy jyl qarjylandyrý jaǵynan qıyndaý tıedi. Biraq 2027 jáne 2028 jyly bıýdjet tıisti deńgeıde bolady degen oıdamyz. Bıýdjettiń kiris bóliginiń oryndalýyna qaraı jetpegen qarjynyń ornyn toltyrýǵa kúsh salynady, - dep qosty N.Esenǵalıev.

Eske sala keteıik, budan buryn BQO-da Oral qalasy men aýdandar boıynsha 4,1 mlrd teńge ıgerilmeı qalǵanyn jazǵan edik.