BQO-da 600 myńnan astam gektar alqapqa aýyl sharýashylyǵy daqyldary egilmek
ORAL. KAZINFORM — Batys Qazaqstan oblysynda 2024 jyly 606,8 myń gektar alqapqa aýyl sharýashylyǵy daqyldary egilmek.
BQO aýyl sharýashylyǵy basqarmasy basshysynyń mindetin atqarýshy Rústem Zulqashevtiń málim etkenindeı, ótken jyly egistik alqaby 623,6 myń gektar bolǵan edi.
Rústem Múlkáıulynyń sózine qaraǵanda, sonyń ishinde 287,2 myńy (2023 jyly – 309 myń ga) – dándi daqyldar. Munyń 97 myńy (82 myń ga) kúzdik dándi daqyldar bolsa, 190,2 myńy (227 myń ga) – jazdyq dándi daqyldar.
Bıyl sondaı-aq 116 myń gektarǵa (114,3 myń ga) maıly daqyldar sebilmekshi. Sonyń 46,7 myńy – kúnbaǵys, 67,7 myńy – maqsary.
Kartop, kókónis-baqsha daqyldaryn 9 760 gektarǵa (9 650 ga) otyrǵyzý kózdelde.
Barlyq mal azyqtyq daqyldar alqaby ótken jylǵy 190,6 myń gektardan bıyl 193,9 myń gektarǵa jetkizilmekshi.
«Bıylǵy egiske barlyǵy 33,9 myń tonna tuqym qajet. Sonyń ishinde 20,6 myń tonna jazdyq dándi daqyldar, 1,9 myń tonna maıly daqyldar, 667 tonna mal azyqtyq daqyldar tuqymy tolyq daıyn. 10,7 myń tonna kartop tuqymynyń 57 paıyzy ázir. Qalǵan 43 paıyzyn jeke turǵyndar ádette kóktemgi egis aldynda satyp alyp paıdalanady. Jalpy oblys tuqymmen tolyq qamtylǵanymen, jetispeıtin aýdandar bar. «Oral-Jer» JShS jáne «Kazagreks» AQ zerthanalary tuqym tekserýdi kóktemgi dalalyq jumystarǵa deıin aıaqtaıdy. Kóktemgi dalalyq jumystarǵa 9 780 traktor, 2 315 dánsepkish, 730 qopsytqysh jáne basqa da aýyl sharýashylyǵy tehnıkalary qatysady dep josparlanyp otyr. Qazirgi tańda tehnıkalardy daıyndaý jumystary júrgizilýde (81 paıyz)», - dedi R.Zulqashev.
Basqarma málimeti boıynsha oblysqa kóktemgi dala jumystaryna 7,9 myń tonna dızel otyny bólindi. Búginde sonyń 1,6 myń tonnasyna kelisim-sharttar jasalyp, ázirge tek 192 tonnasy alyndy. Jumystar jalǵasyn tabady.
Ósimdik sharýashylyǵy baǵytyndaǵy sýbsıdııalaý baǵdarlamalary men qyzmetter kórsetýge jergilikti bıýdjetten barlyǵy 1,9 mlrd teńge berildi.
Oǵan qosa «Agrarlyq nesıe korporatsııasy» AQ-nyń nesıe seriktestikteri arqyly kóktemgi dala jumystaryn qarjylandyrýǵa «Keń dala» baǵdarlamasy boıynsha 2,4 mlrd teńge qaraldy. Búginde sharýalarǵa 1,8 mlrd teńge (75 paıyz) nesıe berildi. Qazirgi ýaqytta nesıeleýge ótinimder qabyldaý jalǵasýda.
Sonymen qatar 2024 jyly «Aýyl amanaty» baǵdarlamasy arqyly ósimdik sharýashylyǵy baǵytynda (baý-baqsha) 63 mln tengeniń 8 jobasy qarjylandyryldy.
«Byltyr kúzde 2024 jyldyń ónimine 97,1 myń gektar kúzdik dándi daqyldar egildi, sonyń ishinde kúzdik bıdaı – 90,1 myń ga, qara bıdaı – 6,6 myń ga jáne trıtıkale – 460 gektar. Qazirgi ýaqytta aýdan ákimdikteriniń málimetinshe saqtalǵan egistiń jaǵdaıy jaqsy dep baǵalanǵany – 31,2 myń ga (32,2 paıyz), qanaǵattanarlyq – 61,6 myń ga (63,4 paıyzy), nashary – 4,2 myń ga (4,3 paıyz)»,- dedi R.Zulqashev.
