BQO-da 6 jasar bala men jasóspirim sýǵa ketti
ORAL. QazAqparat – Oralda alty jasar bala men jasóspirim sýǵa batyp ketti, dep habarlaıdy QazAqparat tilshisi.
BQO Tótenshe jaǵdaılar departamentiniń baspasóz qyzmetinen málim etkenindeı, oqıǵalardyń biri 6 shilde kúni saǵat 20.30-da Rybtseh aýylynda boldy. Shaǵan ózeniniń shomylýǵa jabdyqtalmaǵan tusyna 6 jasar er bala batyp ketken.
Oqıǵa ornyna jedel qutqarý jasaǵy (4 qyzmetker, 1 tehnıka, 1 júzý quraly) bardy. Balanyń múrdesin saǵat 21.04-te týysqandary shyǵaryp alǵan.
Ekinshi oqıǵa osy kúni Oral qalasyna qarasty Jelaev kentinde boldy. «Orys monshasy» aýdanynda saǵat 21.30-da 16 jastaǵy jasóspirim jasandy sý qoımasynan shyqpaı qaldy. Dosymen birge bolǵan ol da jabdyqtalmaǵan jerde shomylǵan. Marqumnyń denesin bir saǵatqa jýyq ýaqytta jergilikti turǵyndar sýdan shyǵardy.
Qutqarýshylar men polıtsııa qyzmetkerleri oqıǵa ornynda boldy.
Batys Qazaqstanda sońǵy kúnderi aptap ystyq bolǵandyqtan sýǵa túsýshiler de kóbeıdi. Alaıda saqtyqty umytýǵa, ásirese, balalardy qaraýsyz qaldyrýǵa bolmaıdy.
Eske sala keteıik, budan buryn Oralda bir kúnde eki adamnyń sýǵa ketkenin jazǵan edik.
