BQO-da 6 myń gektardan astam paıdalanylmaǵan jer memleketke qaıtaryldy
ASTANA. KAZINFORM – Batys Qazaqstan oblysynyń Syrym aýdanynda uzaq ýaqyt boıy paıdalanylmaı kelgen 6 200 gektardan astam jer memleket menshigine qaıtaryldy. Bul týraly oblystyq prokýratýra habarlady.
Syrym aýdanynyń prokýratýrasy jer zańnamasynyń saqtalýyna júrgizgen taldaý barysynda birqatar jer paıdalanýshynyń ózderine berilgen ýchaskelerdi uzaq ýaqyt boıy nysanaly maqsatyna saı paıdalanbaǵanyn anyqtaǵan.
Prokýrorlyq qadaǵalaý sharalarynyń nátıjesinde kadastrlyq quny 75 mln teńgeden asatyn jer ýchaskeleri memleket menshigine qaıtaryldy.
– Qazirgi ýaqytta qaıtarylǵan jer ýchaskeleri zańdy ekonomıkalyq aınalymǵa engizilip jatyr. Sonymen qatar jergilikti atqarýshy organdarǵa Memleket basshysynyń tapsyrmalaryna sáıkes tıisti baǵdar berildi. Atap aıtqanda, qaıtarylǵan jerlerdi aýyldyq jerde turatyn adal nıetti sýbektilerge berý usynyldy, – dep habarlady Batys Qazaqstan oblysynyń prokýratýrasy.
Aıta keteıik, buǵan deıin Aqmola oblysynyń Birjan sal aýdanynda kadastrlyq quny 492,6 mln teńge bolatyn 121 myń gektardan astam jaıylym memleket menshigine qaıtarylǵan edi.
