BQO-da 57 turǵyn úıden sý sorý jumystary aıaqtalyp, 275 adam baspanalaryna oraldy

ORAL. QazAqparat – Batys Qazaqstan oblysynda kóktemgi sý tasqynyna baılanysty evakýatsııalanǵan 275 adam úılerine oraldy, dep habarlaıdy QazAqparat tilshisi.

BQO TJ departamentiniń bastyǵy Ernur Ótegenovtiń málim etkenindeı, 22 adam týystarynyń úılerinde qaldy.

Onyń aıtýynsha, sońǵy táýlikte Oral qalasy men Aqjaıyq, Bórli, Qaratóbe, Kaztalov jáne Báıterek aýdanynda sý tasqynyna qarsy is-sharalar jalǵastyryldy.

«Qaýipti jerlerde ınertti materıal salynǵan 5 myńnan astam qap tóseldi. Qosymsha 4 myńǵa jýyq qap daıyndaldy. 75 myńnan astam tekshe metr sý soryldy. Sý tasqyny bastalǵannan beri oblys boıynsha 500 myń tekshe metr sý soryldy. Sonyń ishinde osyǵan deıin sý kirgen 57 turǵyn úıden sý sorý jumystary aıaqtaldy. Jaǵdaı turaqty baqylaýda. Qazirgi tańda sý tasqyny saldaryn joıý jumystary oblys ortalyǵyndaǵy 20 saıajaı aýmaǵynda júrgizilýde», dedi Ernur Ótegenov.

Departament bastyǵynyń sózine qaraǵanda, kúni búgin Derkól, Shaǵan jáne Shyńǵyrlaý ózenderi arnalaryndaǵy sý deńgeıine monıtorıng júrgizilýde. Sý deńgeıiniń kúrt kóterilýi baıqalmaıdy. 11 gıdrobekette sý deńgeıi baqylanýda.

Eske sala keteıik, budan buryn BQO-da kólik qatynasy úzilgen aýyldardan 11 júkti áıel shyǵarylǵanyn jazǵan bolatynbyz.

Sondaı-aq Batys Qazaqstanda 100-den astam kıik sýdan shyǵaryldy.

BQO-da 100-den astam adam úılerine oralyp jatyr.

Batys Qazaqstanda Jaıyq ózeninde sý deńgeıi kóterilýi múmkin.