BQO-da 57 mln teńgeniń temekisi men qoldan jasalǵan ishimdikti zańsyz satqan turǵyn ustaldy

ORAL. QazAqparat – Batys Qazaqstan oblysynda 57 mln astam teńgeniń temeki ónimderin zańsyz ótkizýmen aınalysqan turǵyn ustaldy, dep habarlaıdy QazAqparat tilshisi.

BQO boıynsha ekonomıkalyq tergep-tekserý departamentinen málim etkendeı, atalǵan turǵyn 2022 jyldyń qarashasy men bıylǵy 17 qańtar aralyǵynda úshinshi elderden eki ólshemdi matrıtsalyq shtrıhkod túrindegi tutyný qaptamasynyń sáıkestendirý quralynsyz temeki ónimderin, sondaı-aq quramynda spırti bar zattardy kóterme saýdada zańsyz ótkizýmen shuǵyldanǵan.

Jedel izdestirý is-sharalary nátıjesinde jalpy somasy 57 mln teńgeden asatyn eki ólshemdi tsıfrlyq tańbasy joq 90 myń qorap temeki ónimi, quramynda spırti bar zat quıylǵan, barlyǵy 320 lıtr kólemindegi plastık ydystar tabylyp, alyndy.

«Sonymen qatar qazirgi zamanǵy qadaǵalaý quraldary men jasyryn ádisterdi paıdalana otyryp, jedel kombınatsııany júzege asyrý barysynda zańsyz temeki ónimderin barlyq satýshylar men qolma-qol aqsha qozǵalysy týraly málimetterdi qamtıtyn «qara kassa» anyqtaldy» dep habarlady vedomstvodan.

Eske sala keteıik, budan buryn Batys Qazaqstanda 22 mln teńge jymqyrǵan býhgalterdiń sottalǵanyn jazǵan bolatynbyz.